Հայաստանը մտադիր է օգտվել ԵՎրԱզԷՍ-ի հակաճգնաժամային հիմնադրամի միջոցներից, հինգշաբթի կառավարության նիստի ընթացքում ասաց ՀՀ վարչապետ Տիգրան Սարգսյանը:
«Հայաստանը ֆինանսական միջոցներ հայթայթելու և տնտեսության զարգացմանն աջակցելու ևս մեկ հնարավորություն ունի: Խոսքը ԵվրԱզԷս-ի շրջանակներում ձևավորվող հակաճգնաժամային հիմնադրամի մասին է, որտեղ կկուտակվի շուրջ 10 միլիարդ դոլար, և մենք կարող ենք օգտվել այդ միջոցներից», - ասաց ՀՀ կառավարության ղեկավարը:
ԵվրԱզԷՍ-ի հակաճգնաժամային հիմնադրամի (10 միլիարդ դոլարի չափով) ստեղծման մասին պայմանագիրը ստորագրվել է Հայաստանի մասնակցությամբ հունիսի 9-ին Մոսկվայում՝ կառավարության ղեկավարների մակարդակով կազմակերպված ԵվրԱզԷՍ-ի միջպետական խորհրդի նիստի շրջանակներում: Հիմնադրամի կանոնադրական կապիտալը կկազմի 10 միլիարդ դոլար, որից Ռուսաստանին բաժին է հասնում 7,5 միլիարդը:
Միաժամանակ ՀՀ վարչապետը նշեց, որ ցավոք Հայաստանը դեռևս մշակված ծրագրեր չունի, որոնք կարելի կլիներ ներկայացնել հիմնադրամին միջոցները ստանալու համար: Սարգսյանը տեղեկացրեց, որ այժմ միայն էներգետիկայի և քիմիայի ոլորտում կա 2 ծրագիր, որոնք երաշխավորված են կառավարության կողմից և ներկայացվել են հիմնադրամի քննարկմանը:
«Սակայն դա բավարար չէ: Իմ որոշմամբ աշխատանքային խումբ է ստեղծվել՝ ՀՀ ֆինանսների փոխնախարար Վարդան Արամյանի գլխավորությամբ, որը բոլոր նախարարությունների և գերատեսչությունների հետ համագործակցելիս պետք է բացահայտի և մշակի Հայաստանի համար անհրաժեշտ ծրագրերը, որոնք մենք կարող ենք ներկայացնել Հիմնադրամին՝ որոշակի ֆինանսական միջոցներ ստանալու համար», - ասաց Սարգսյանը:
Հ կառավարության ղեկավարի խոսքերով, հիմնական խնդիրն այն է, որ երկիրը լրացուցիչ ֆինանսական միջոցներ հայթայթելու հնարավորություն ունի, սակայն չկան հստակ ծրագրեր, որոնք կառավարության անունից կներկայացվեն Հիմնադրամին: Այս կապակցությամբ Սարգսյանը խնդրեց կառավարության անդամներին առավելագույն կերպով աջակացել խմբի աշխատանքներին:
Վարչապետն ավելացրեց, որ խոշոր ծրագրերի սահմանումից հետո գործարար-նախագծերի մշակմանը կներգրավվեն հեղինակավոր ընկերություններ: «Որքան շուտ մենք օգտվենք Հիմնադրամի հնարավորություններից, այդքան ավելի լավ», - նշեց նա:
Ենթադրվում է, որ Հակաճգնաժամային հիմնադրամն իր աշխատանքը կսկսի արդեն 2009թ.-ին: Հիմնադրամի միջոցները կօգտագործվեն մասնակից-պետություններին ինքնավար պարտքեր և կայունացնող վարկեր տրամադրելու, ինչպես նաև միջպետական ներդրումային նախագծեր ֆինանսավորելու համար:-0-
