Հայաստանի հատուկ կրթության ոլորտում արձանագրվել են ամենամեծ հաջողությունները, չորեքշաբթի հայտարարեց ՀՀ կրթության և գիտության նախարար Արմեն Աշոտյանը «Հատուկ կրթության բարեփոխումների հեռահար նպատակները. նոր հայացք, նոր մոտեցումներ» միջազգային գիտաժողովի բացմանը։
«Կրթական ոլորտի բարեփոխումների հորձանուտում հենց հատուկ կրթության ոլորտում են արձանագրվել ամենամեծ հաջողությունները, ոչ միայն վիճակագրական, այլ նաև հանրային ընկալման համատեքստում»,- ասաց Աշոտյանը։
Նախարարն ավելացրեց, որ կրթության հատուկ պայմանների կարիք ունեցող երեխաները պետության ուշադրության կենտրոնում են։ «Մեր նախարարության կողմից բազմաթիվ բարեփոխումներ են անցկացվել հատուկ և ներառական կրթության բնագավառում»,- ասաց Աշոտյանը։
Նա նշեց, որ այդ բարեփոխումների շրջանակներում փոփոխություններ են կատարվել նաև օրենսդրությունում, մեծացվել է ֆինանսավորումը, ակտիվ համագործակցություն է հաստատվել հասարակական կազմակերպությունների հետ։ Միաժամանակ նա հատուկ նշեց համագործակցությունը «Հույսի կամուրջ» կազմակերպության հետ։
Նախարարի խոսքերով, նկատի առնելով հատուկ կրթության ոլորտի ֆինանսավորման աճը՝ շատ կարևոր տեղ է հատկացվում այդ միջոցների նպատակային ծախսելու վերահսկողության խնդրին։
Իր կողմից Հայաստանում ՄԱԿ-ի Մանկական հիմնադրամի (ՅՈՒՆԻՍԵՖ) ներկայացուցիչ Լեյլի Մոշիրի-Գիլանին (Laylee Moshiri-Gilani) կոչ է արել հատուկ ուշադրություն դարձնել մանկատներում հաշմանդամ-երեխաների մեծ թվին, ինչը, նրա կարծիքով, վկայում է, որ նրանց չեն համարում հասարակության լիիրավ անդամ։ -0-
