ՀՀ վարչապետ Տիգրան Սարգսյանը երեքշաբթի ընդունել է Երևանում գտնվող Սիրիայի մշակույթի նախարար Ռիադ Նաասան Աղային:
Ինչպես «Նովոստի-Արմենիա» գործակալությանը տեղեկացրեցին ՀՀ կառավարության մամուլի ծառայությունից, հանդիպման ընթացքում Սարգսյանը հատկանշական է համարել, որ Սիրիայի Արաբական Հանրապետության նախագահի այցին անմիջապես հաջորդել է Հայաստանում Սիրիայի մշակույթի օրերի անցկացումը`որպես երկկողմ համագործակցության նոր դրսևորում:
Սիրիայի նախագահը գտնվում էր Հայաստանում հունիսի 17-18-ը: Հայաստանում Սիրիայի մշակույթի օրերը մեկնարկել են հունիսի 29-ին և կտևեն մինչև հուլիսի 4-ը:
Ռիադ Նաասան Աղան իր հերթին ՀՀ վարչապետին է փոխանցել Սիրիայի վարչապետի ջերմ ողջույնները:
Զրույցի ընթացքում երկու երկրների միջև մշակութային համագործակցությունը գնահատվել է կայուն և զարգացող, ինչին կարող է նոր թափ հաղորդել տնտեսական կապերի աշխուժացումը, զբոսաշրջության զարգացումը:
Զրուցակիցները կարևորել են նաև Սիրիայի հայ համայնքի դերը Հայաստանի և Սիրիայի միջև դարավոր կապերի ամրապնդման և բարեկամ ժողովուրդների միջև որակապես նոր հարաբերությունների ձևավորման գործում:-0-
