Հայաստանում համաներմամբ ազատ է արձակվել 228 դատապարտյալ

ԵՐԵՎԱՆ, 30 հունիսի. /Նովոստի-Արմենիա/. Հայաստանի Հանրապետության Ազգային ժողովի հունիսի 19-ի «Համաներում հայտարարելու մասին» որոշման համաձայն Արդարադատության նախարարության քրեակատարողական հիմնարկներից ս.թ. հունիսի 29-ի դրությամբ ազատ է արձակվել թվով 228 դատապարտյալ, երեքշաբթի «Նովոստի-Արմենիա» գործակալությանը հայտնեց ՀՀ արդարադատության նախարարության քրեակատարողական վարչության մամուլի քարտուղար Արսեն Բաբայանը։

«Հունիսի 29-ի դրությամբ պատժից ազատված դատապարտյալներից հինգը կանայք են և երեքն՝ անչափահաս»,- ասվում է հաղորդագրությունում։

Վարչության տվյալների համաձայն, հունիսի 29-ի դրությամբ «Նուբարաշեն» քրեակատարողական հիմնարկից (ՔԿՀ) ազատ է արձակվել 44 մարդ, «Արթիկ» ՔԿՀ-ից՝ 15 դատապարտյալ, «Վանաձոր» ՔԿՀ-ից՝ 15 դատապարտյալ, «Գորիս» ՔԿՀ-ից՝ 5 դատապարտյալ:

Ըստ վարչության տվյալների, հունիսի 29-ի դրությամբ «Էրեբունի» ՔԿՀ-ից ազատվել է 55 դատապարտյալ, «Սևան» ՔԿՀ-ից՝ 19 դատապարտյալ, «Կոշ» ՔԿՀ-ից՝ 23 դատապարտյալ, «Վարդաշեն» ՔԿՀ-ից՝ 24 դատապարտյալ,  «Հրազդան» ՔԿՀ-ից՝ 2 դատապարտյալ, «Մեղրի» ՔԿՀ-ից 8 դատապարտյալ, «Աբովյան» ՔԿՀ-ից՝ 10 դատապարտյալ:

Հունիսի 29-ի դրությամբ «Երևան-Կենտրոն» ՔԿՀ-ից ազատվել է 1 դատապարտյալ, «Դատապարտյալների հիվանդանոց» ՔԿՀ-ից՝ 7 դատապարտյալ:

ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:

Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում: Համաներումը տարածվում է նաև հետախուզման մեջ գտնվող անձանց վրա, ովքեր կհանձնվեն իրավապահ մարմիններին մինչև 2009թ.-ի հուլիսի 31-ը: -0-