ԵՐԵՎԱՆ, 30 հունիսի. /Նովոստի-Արմենիա/. Հայաստանում երկուշաբթի մեկնարկել է «ԱՊՀ երկրների զարգացման նորամուծական ուղին. ռազմավարություն ու հեռանկարներ» գիտագործնական գիտաժողովը:
Կոնֆերանսի կազմակերպիչներն են ՀՀ գիտությունների ազգային ակադեմիան, Երևանի ճարտարապետաշինարարական համալսարանը, «Նորարարության ակադեմիա «Глобеликс- Р» (Ռուսաստան) գիտահետազոտական կազմակերպությունը, Սարատովի պետական տեխնիկական համալսարանը, տեղեկացրեցին ՀՀ ԳԱԱ մամուլի ծառայությունից:
«Մեր խնդիրը Հայաստանում և ԱՊՀ այլ երկրներում նորարար տնտեսության զարգացման համար պայմաններ ստեղծելն է: Նոր պայմանները նոր մոտեցումներ են պահանջում, և դրան կարելի է հասնել հաջող համագործակցության դեպքում», - ողջույնի խոսքում հայտարարել է ՀՀ ԳԱԱ նախագահ Ռադիկ Մարտիրոսյանը:
«Հայաստանին տասը գիտնական և երկու միլիոն դոլար է անհրաժեշտ, որպեսզի այն հինգ տարի անց բարգավաճ երկիր լինի»: Հայաստանի համար հակաճգնաժամային դեղատոմսի մասին խոսել է ՌԴ գիտությունների ակադեմիայի ակադեմիկոս Սերգեյ Գլազևը, ով ներկայացրել է «Նոր տեխնոլոգիական կենսակարգի անցումային շրջանի պայմաններում ԱՊՀ երկրներում հակաճգնաժամային քաղաքականության ռազմավարություն» թեմայով զեկույցը:
Հեռանկարային ուղղությունների թվում նա նշել է Հայկական ատոմային էլեկտրակայանի հիման վրա ատոմային արդյունաբերության համալիր զարգացումը, որն, իր կարծիքով, օգտագործվում է միայն մեկ ուղղությամբ՝ էլեկտրաէներգիա ստանալու համար:
Գլազևի կարծիքով, կարելի է նաև հաջողությամբ յուրացնել գենային ինժեներիայի ուղղությունը, որը լավ հիմք ունի և արդարացնում է կատարված ներդրումները: Եվս մեկ հեռանկարային ուղղություն է բուհական գիտության ֆինանսավորումը՝ երիտասարդ կադրերի ներգրավվման նպատակով:
Առանձին լիագումար նիստ նվիրված էր բուհական կրթության և գիտության կազմակերպման նորարար սկզբունքներին:
Ազգային նորարար համակարգերի ձևավորման հետ մեկտեղ քննարկվում էին նաև միջպետական նորարար համակարգերի ձևավորման մեխանիզմները, ինչը, գիտագործնական գիտաժողովի մասնակիցների կարծիքով, գլոբալ ճգնաժամից դուրս գալու հարթակներից մեկն է:
Որոշում է ընդունվել ընդլայնել նորարար տնտեսությանը նվիրված կոնֆերանսը, որին կարող էին մասնակցել ԱՊՀ բոլոր երկրները:-0-
