Ազգային ժողովի նախագահ Հովիկ Աբրահամյանն ու Սիրիայի մշակույթի նախարար Ռիադ Նաասան Աղան երկուշաբթի հանդիպման ժամանակ քննարկեցին երկրների միջև երկկողմ համագործակցության հարցեր, հայտնում են հայկական խորհրդարանի հասարակայնության հետ կապերի վարչությունից:
«Կողմերը հատուկ ընդգծեցին մշակույթի բնագավառում երկկողմ համագործակցությունը խթանելու անհրաժեշտությունը, որի շնորհիվ հնարավոր կլինի էլ ավելի ամրապնդել հայ-սիրիական հարաբերությունների հիմքերը»,- ասվում է հաղորդագրության մեջ:
Հայաստանի խորհրդարանի նախագահն իր գոհունակությունը հայտնեց վերջերս արձանագրված հայ-սիրիական շփումների ակտիվացման կապակցությամբ: Նա կարևորեց Հայաստանում Սիրիայի մշակույթի օրերի անցկացումը` որպես երկկողմ համագործակցության յուրօրինակ դրսևորում:
Հանդիպման ընթացքում զրուցակիցները կարևորեցին սիրիահայ համայնքի դերը երկու երկրների միջև համագործակցությունը խորացնելու գործում, քանի որ այն կարող է հանդիսանալ բնական կամուրջ երկու բարեկամ ժողովուրդների միջև:-0-
