Շվեյցարիան մտադիր է մոտ ժամանակում դիվանագիտական ներկայացուցչություն բացել Հայաստանում, տեղեկացրեց Շվեյցարիայի արտաքին գործերի նախարար Միշլին Կալմի-Ռեյը Հայաստանի ԱԳՆ ղեկավար Էդվարդ Նալբանդյանի հետ երկկողմ հանդիպման ընթացքում։
Հայաստանի և Շվեյցարիայի ԱԳՆ ղեկավարների հանդիպումը տեղի ունեցավ Կորֆու կղզում, Եվրոպայում անվտանգության ամրապնդման հարցերին նվիրված ԵԱՀԿ արտգործնախարարների ոչ պաշտոնական հանդիպման շրջանակներում:
Հանդիպմանը Էդվարդ Նալբանդյանը հանդես եկավ ելույթով, որտեղ ներկայացրեց Հայաստանի տեսակետները Եվրոպայում անվտանգության ապահովման վերաբերյալ:
ԵԱՀԿ արտգործնախարարների հանդիպման շրջանակներում ՀՀ ԱԳ նախարարը մասնակցեց նաև ՀԱՊԿ անդամ երկրների արտաքին քաղաքական գերատեսչությունների ղեկավարների հանդիպմանը։
Էդվարդ Նալբանդյանի հանդիպում ունեցավ նաև Դանիայի արտգործնախարար Պեր Ստիգ Մյոլլերի հետ, ով վերահաստատեց իր այցը Հայաստան ընթացիկ տարվա աշնանը։ Հանդիպման ընթացքում կողմերը քննարկեցին քաղաքական և տնտեսական բնագավառներում երկկողմ հարաբերությունների զարգացման ուղիները, մտքեր փոխանակեցին Հարավային Կովկասում անվտանգության ապահովմանն առնչվող հարցերի վերաբերյալ:
ՀՀ ԱԳ նախարար Էդվարդ Նալբանդյանը հանդիպում ունեցավ ԱՄՆ փոխպետքարտուղար Ջեյմս Ստայնբերգի, կանադացի և իռլանդացի գործընկերներ Լորենս Քաննոնի և Մայքլ Մարտինի հետ։ -0-
