ԵՐԵՎԱՆ, 26 հունիսի. /Նովոստի-Արմենիա/. «Հազարամյակի մարտահրավերներ» կորպորցիայի կողմից ճանապարհային շինարարության ծրագրի ֆինանսավորման դադարեցումը միտված չէ վիրավորելու հայ ժողովրդին, մասնավորապես, գյուղական համայնքների անապահով բնակչությանը, «Նովոստի-Արմենիա» գործակալությանը տված հարցազրույցի ժամանակ ասաց Հայաստանում ԱՄՆ արտակարգ և լիազոր դեսպան Մարի Յովանովիչը։
«Հազարամյակի մարտահրավեր կորպորացիայի (ՀՄԿ) տնօրենների խորհրդի որոշումը՝ չշարունակել ճանապարհների կառուցման ու վերականգնման ծրագրի ֆինանսավորումը, շարունակությունն է 2008թ-ի նախագահական ընտրություններից հետո կայացված որոշման: 2008 թ-ից ի վեր ՀՄԿ –ն բազմիցս անմիջական կապի մեջ է մտել Հայաստանի կառավարության հետ: ՀՄԿ տնօրենների խորհուրդը հստակորեն ներկայացրել է այն գործողությունները և քայլերը, որոնք պահանջվում էին Հայաստանից ծրագիրը վերսկսելու համար», -ասաց Յովանովիչը։
«Հազարամյակի մարտահրավերներ» ամերիկյան կորպորցիան դադարեցրել է Հայաստանի գյուղական ճանապարհների շինարարության ծրագրի ֆինանսավորումը՝ իր որոշումը պատճառաբանելով նրանով, որ հանրապետության իշխանությունների ձեռնարկած քայլերը չեն համապատասխանում ժողովրդավարական կառավարման չափանիշներին։
Ամերիկյան դիվանագետի խոսքերով, Կայացված որոշումը միտված չէ վիրավորելու հայ ժողովրդին, մասնավորապես, գյուղական համայնքների անապահով բնակչությանը: ՀՄԿ-ն գործակալություն է, որի նպատակն է օգնել աղքատներից աղքատներին և տնտեսական աճի միջոցով կրճատել աղքատությունը:
«Գործակալությունը, ելնելով օրենսդրական պահանջներից, պարտավոր է աշխատել այն երկրների հետ, որոնք բավարարում են ՀՄԿ-ի ցուցանիշներին», - ասաց դեսպանը։
Դեսպանը նշեց, որ ՀՄԿ-ի որոշումը բխում է Հայաստանի կառավարության` մի քանի կարևոր ցուցանիշների կատարողականը ժամանակի ընթացքում բարելավելու անկարողությունից:
«Մենք հուսով ենք, որ ժողովրդավարական կառավարման մեջ բարելավումներ կլինեն: Երբ տեսնենք շոշափելի բարելավում այդ ոլորտում, մենք ակտիվորեն կհամագործակցենք Հայաստանի կառավարության, ինչպես նաև մեր Կոնգրեսի հետ` գտնելու ֆինանսավորման այլ մեխանիզմներ», - ասաց Յովանովիչը։
«Հազարամյակի մարտահրավերներ» ամերիկյան կորպորցիան Հայաստանում մեկնարկել է 2006 թ.-ի սեպտեմբերի 29-ին։ Պայմանագրով նախատեսվում էր, որ «Հազարամյակի մարտահրավերներ» ընկերությունը հինգ տարվա կտրվածքով Հայաստանին հատկացնելու է 235,65 մլն. դոլար՝ ոռոգման համակարգերը և համայնքային ճանապարհները վերականգնելու ծրագրերի իրականացման համար։ -0-
