Թուրքիան Հայաստանի հետ երկխոսությունը շարունակում է նախապայմաններով, ուրբաթ լրագրողներին հայտնեց ՀՅԴ Հայ դատի գրասենյակի և քաղաքական հարցերի պատասխանատու Կիրո Մանոյանը:
«Ես չեմ կարծում, որ Թուրքիան «թայմ-ութ» է վերցրել Հայաստանի հետ ֆուտբոլային դիվանագիտությունում»: Ինձ մոտ այն տպավորությունն է, թե Հայաստանը ժամանակավորապես դուրս է եկել խաղից, քանի որ Թուրքիան շարունակում նախապայամաններով խոսել, իսկ մենք չենք ցանկանում տեսնել դա և չենք հայտարարում բանակացային գործընթացից դուրս գալու մասին»,- ասաց Մանոյանը:
Ընդ որում նա նշեց, որ Հայաստանը դժվար թե դուրս գա բանակցային գործընթացից, քանի որ հայ-թուրքական բանակցություններն աշխարհին ցույց են տալիս, որ Հայաստանը կողմ է բանակցություններին:
«Ես կարծում եմ, որ աշխարհն արդեն տեսել է Հայաստանի մտադրությունը, և այժմ անհրաժեշտ է մնալ այն դիրքորոշմանը, որը բխում է բանակցային գործընթացի տրամաբանությունից»:
Նա նաև ավելացրեց, որ Հայաստանն այլևս չպետք է կողմ լինի այն դիրքորոշմանը, որն ինչ-որ բան կապացուցի այս կամ այն երկրին:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Թուրքիան երկկողմ հարաբերությունների հաստատաման համար առաջ է քաշում մի շարք նախապայմաններ, մասնավորապես, Հայաստանի կողմից Օսմանյան Թուրքիայում 1915թ. իրագործված Եղեռնի ճանաչմանն ուղղված ջանքերից հրաժարվելը և ղարաբաղյան հիմնախնդրի լուծումը` հօգուտ Ադրբեջանի:
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
