Վրաստանը փորձում է փոխել Ջավախքի ժողովրդագրական իրավիճակը. Դաշնակցություն

Վրաստանը փորձում է փոխել հայաբնակ Ջավախքի ժողովրդագրական իրավիճակը, հայտարարել է ՀՅԴ Հայ դատի գրասենյակի և քաղաքական հարցերի պատասխանատու Կիրո Մանոյանը։

«Վրաստանի կողմից անկախության ձեռքբերման առաջին իսկ օրվանից այդ երկիրը փորձում է օգտագործել հնարավոր բոլոր միջոցները՝ Ջավախքում ժողովրդագրական իրավիճակը փոխելու համար։ Այս գործընթացին մասնակցում է նաև Վրաց ուղղափառ եկեղեցին», - հայտարարեց Մանոյանը։

Նրա խոսքերով՝ այս խնդիրը բարձրացվել էր բողոքի ակցիայի ընթացքում, որն անցկացվել էր նախօրեին Երևանում՝ Միխայիլ Սահակաշվիլու Հայաստան այցի  կապակցությամբ։

Բողոքի ակցիան ծրագրված էր անցկացնել Հանրապետության Հրապարակում  գտնվող «Արմենիա-Մարիոթ» հյուրանոցի շենքի մոտ, սակայն ոստիկանությունը դուրս էր բերել ցուցարարներին հրապարակից։

«Կարծում եմ, որ երեկվա ակցիայի կազմակերպիչների դիրքորոշումը հասցվել է Վրաստանի նախագահին։ Ողջ խնդիրն այն է, որ Հայաստանում քաղաքական որոշում էր ընդունվել, որ Սահակաշվիլին չհանդիպի ցուցարարներից որևէ մեկի հետ», - հայտարարեց Մանոյանը։

Նրա խոսքերով՝ ոստիկանության կողմից ձեռնարկված միջոցառումների արդյունքում բողոքը մեծ արձագանք ստացավ։ «Ինձ համար անհասկանալի է, թե ինչու հայկական իշխանություններն արեցին այնպես, որ Սահակաշվիլին չծանոթանա իրականությանը, չէ՞ որ Ջավախքը պետք է կապող օղակ հանդիսանա Հայաստանի և Վրաստանի միջև», - ավելացրեց Մանոյանը։

Ջավախքը գտնվում է Վրաստանի, Հայաստանի և Թուրքիայի սահմանագծին։ Բնակչության ճնշող մեծամասնությունը հայեր են (տարբեր տվյալներով 91-97%)։

Հունիսի 24-25-ին երկօրյա պաշտոնական այցով Հայաստանում էր Վրաստանի նախագահ Միխայիլ Սահակաշվիլին և նրա տիկին Սանդրա Ռուլովսը: --0—