Տարվա արդյունքներով տնտեսական անկումը Հայաստանում 7-8 տոկոսի մակարդակում կլինի, կարծում է ֆինանսավարկային և բյուջետային հարցերի խորհրդարանական հանձնաժողովի ղեկավար Գագիկ Մինասյանը։
«Ակնհայտ է, որ ՀՆԱ աճի այն ցուցանիշը, որ պետբյուջեում գրանցված է 9,2 տոկոսի մակարդակում, չի իրականացվի, և այս իրավիճակում են հայտնվել ոչ միայն ԱՊՀ պետությունները, այլև շատ այլ երկրներ, որոնց բյուջեում աճ էր նախատեսվում»,- հինգշաբթի նա ասաց լրագրողներին Մամուլի ազգային ակումբում։
Ընդ որում Մինասյանը անհրաժեշտ չի համարում որևէ փոփոխություն կատարել պետբյուջեում, քանի որ օրենսդրական մակարդակում նման պահանջ առաջ չի քաշվում։
Այս առնչությամբ պատգամավորն ասաց, որ կառավարության կողմից կատարվող քայլերը, մասնավորպես, խոշոր ներդրումային նախագծերի իրականացումը Հայաստանի տնտեսության ավելի ինտենսիվ զարգացում կապահովի երկրորդ կիսամյակում։
«Ես կարծում եմ, որ սա թույլ կտա անկումը կրճատել 6-7 տոկոսով ներկայիս ցուցանիշից»,- ասաց նա։
Տնտեսական անկումը Հայաստանում, օպերատիվ վիճակագրական տվյալներով, 2009 թ.-ի հունվար-մայիսին 15,7 տոկոս է կազմել։
Մինասյանը նաև հավելեց, որ դեռևս ճգնաժամի սկզբին ՀՀ նախագահ Սարգսյանը հայտարարել էր, որ անկախ ամեն ինչից, սոցիալական ծախսերը լիովին կիրականացվեն, իսկ աշխատավարձերը, թոշակներն ու նպաստները կվճարվեն ժամանակին ու ամբողջական չափով, «ինչի ականատեսն ենք մենք վերջին 5 ամսում»։ -0-
