ԵՐԵՎԱՆ, 25 հունիսի. /Նովոստի-Արմենիա/. ՀՀ խորհրդարանի կողմից հունիսի 19-ին հայտարարված համաներման արդյունքում չորեքշաբթի օրվա դրությամբ արդեն 200 մարդ է ազատ արձակվել, տեղեկացրել է ՀՀ արդարադատության նախարարության քրեակատարողական վարչության մամուլի քարտուղար Արսեն Բաբայանը:
«Հունիսի 24-ի դրությամբ ազատ արձակվածներից հինգը կանայք են և երեքը՝ անչափահասներ: Եվս հինգ դատապարտվածի համար կրճատվել է պատիժ կրելու ժամկետը», - ասաց Բաբայանը:
Վարչության տվյալների համաձայն՝ հունիսի 24-ի դրությամբ «Էրեբունի» քրեակատարողական հիմնարկից ազատ է արձակվել 47 մարդ, «Սևան» ՔԿՀ-ից՝ 18 մարդ, «Երևան-Կենտրոն» և «Հրազդան» ՔԿՀ-ից՝ մեկական մարդ, «Կոշ» ՔԿՀ-ից՝ 23 մարդ:
Հունիսի 23-ի տվյալներով՝ Հայաստանի տարբեր ՔԿՀ-ից ազատ էր արձակվել 103 մարդ, ևս չորս մարդկանց ազատազրկամ ժամկետը կրճատվել էր:
ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:
Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում:-0-
