ԵՐԵՎԱՆ, 25 հունիսի. /Նովոստի-Արմենիա/. «Բելավիա» ավիաընկերության СRJ-100LR ինքնաթիռը 2008թ.-ին Երևանում ավիավթարի ենթարկվեց, քանի որ նա չէր մշակվել հակասառցակալման հեղուկով: Այս մասին հաղորդում է ԲԵԼՏԱ գործակալությունը՝ հղում անելով ավիաընկերության գլխավոր տնօրեն Անատոլի Գուսարովին:
«Դեպքի պատճառները թաքնված են արտադրողի կողմից պոտենցիալ կամ հնարավոր սառցակալման պայմաններում այդ տիպի ինքնաթիռի պաշտպանութան համակարգի անբավարար մշակման մեջ: Ինչպես ցույց տվեցին բազմաթիվ ուսումնասիրություններն ու փորձաքննությունները, ինքնաթիռը պետք է մշակվեր հակասառցակալման հեղուկով, դա կարող էր օգնել խուսափել ողբերգությունից», - պարզաբանել է Գուսարովը:
Միաժամանակ նա նշել է, որ այդ ժամանակ գործող տեխնիկական փաստաթղթերի (մթնոլորտային ճնշման ջերմության և այլ պարամետրերի վերաբերյալ) համաձայն՝ ինքնաթիռը նման մշակման ենթարկելու անհրաժեշտություն չէր եղել:
«Բելավիա»-ի գլխավոր տնօրենը նշել է, որ այս տիպի ինքնաթիռներ արտադրող «Բոմբարդյե» կանադական ընկերությունն ու որոշ երկրների ավիացիոն իշխանությունները լրացուցիչ նորմատիվներ են սահմանել, որոնք խստացնում են նմանատիպ ինքնաթիռների հակասառցակալման մշակումը ապահովելու պահանջները, այդ թվում նաև՝ ինքնաթիռի թևի, շարժիչի և ինքնաթիռի այլ բաղկացուցիչների հակասառցակալման համակարգերն ավելի շուտ միանալն ու անջատվելը: Նման միջոցներ են ձեռք առնվել СRJ ինքնաթիռների (ավիավթարի ենթարկված «Բելավիա» ավիաընկերության ինքնաթիռը ևս պատկանում էր СRJ տեսակին) հետ տեղի ունեցած մի շարք ավիավթարներից հետո:
ԲԵԼՏԱ գործակալության տեղեկատվության համաձայն՝ Գուսարովն ավելացրել է, որ դեպքի հետ կապված քրեական գործի քննությունը դեռ չի ավարտվել, և դա է պատճառը, որ դեպքի վերաբերյալ ավելի լիարժեք տեղեկատվություն չի տարածվում:
Նախորդ տարվա փետրվարի 13-ի գիշերը, Երևանի «Զվարթնոց» միջազգային օդանավակայանից դեպի Մինսկ չվերթ իրականացնելիս, «Բելավիա» ավիաընկերության СRJ-100LR ինքնաթիռը վերելքի ժամանակ դուրս էր եկել ուղեգծից, շրջվել մեկ թևի վրա, հարվածել գետնին, ինչի հետևանքով տեղի էր ունեցել պայթյուն, և ինքնաթիռը բաժանվել էր երկու մասի: Վառվող ինքնաթիռից հաջողվել էր դուրս բերել բոլոր 18 ուղևորներին և անձնակազմի երեք անդամներին: Ինքնաթիռում գտնվող մարդիկ տարբեր աստիճանի մարմնական վնասվածքներ էին ստացել:
Հայաստանի ավիացիոն իշխանությունների կողմից միջազգային կանոններին համապատասխան ստեղծված հատուկ հանձնաժողովը, որի մեջ ընդգրկված էին նաև Միջպետական ավիացիոն կոմիտեի մասնագետներ, մանրակրկիտ վերլուծել էր հետաքննության ընթացքում հավաքված ողջ տեղեկատվությունը: Մասնագետների ուշադրություն կենտրոնում էին ավիավթարի պատճառների երկու հիմնական տարբերակները՝ մարդկային գործոնն ու ինքնաթիռի տեխնիկական անսարքությունը:-0-
