Ռուս-վրացական հարաբերությունների շուտափույթ կարգավորումը ելնում է Հայաստանի ազգային շահերից, ասել է ՀՀ նախագահ Սերժ Սարգսյանը:
«Մենք դրանում խորապես շահագրգռված ենք», - ասել է նա իր վրացի գործընկեր Միխայիլ Սահակաշվիլու հետ տեղի ունեցած համատեղ մամուլի ասուլիսի ժամանակ:
Սարգսյանը նշել է, որ Հայաստանը ռազմավարական հարաբերություններ ունի Ռուսաստանի հետ, իսկ Վրաստանի հետ նրան կապում են բազմադարյա հարաբերությունները:
«Մենք խորացնում ենք մեր հարաբերությունները և Ռուսաստանի, և Վրաստանի հետ և անում ենք դա բաց, առանց վարանումների, առանց քողարկման և բաց երեսով», - ասել է նա:
Նշելով, որ բոլորն այսօր Ռուսաստանի և Վրաստանի հետ Հայաստանի հարաբերությունների վկաներն են՝ ՀՀ նախագահն ընդգծել է, որ եթե և Ռուսաստանի, և Վրաստանի հետ հայկական կողմի ունեցած լավ հարաբերությունները կարող են որևէ կերպ նպաստել ռուս-վրացական հարաբերությունների կարգավորմանը, «ապա մենք միայն ուրախ կլինենք»:
«Սակայն մենք երբեք նման խնդիր մեր առջև չենք դրել: Ես կարծում եմ, որ մեր խնդիրը մեր հարաբերությունների խորացումը պետք է լինի: Մենք դա միշտ պետք է հաշվի առնենք, նաև այն, որ Հայաստան-Ռուսաստան, Հայաստան-Վրաստան հարաբերությունների մակարդակը զգալիորեն ազդում է տարածաշրջանի անվտանգության հարցի վրա»:
ՀՀ նախագահը նշել է, որ անհրաժեշտ է «միշտ հաշվի առնել բարեկամների շահերն ու երբեք չանտեսել դրանք»:-0-
