ՀՀ տնտեսության անկումը 2009 թ.-ի արդյունքներով չի գերազանցի 10 տոկոսը, իսկ գնաճը կգտնվի 3 տոկոսի սահմաններում, չորեքշաբթի լրագրողներին տեղեկացրեց Հայաստանում ԱՄՀ մշտական ներկայացուցիչ Նինկե Օմեսը (Nienke Oomes):
«ՀՀ տնտեսության անկումը 2009թ.-ի արդյունքներով չի գերազանցի 10 տոկոսը և ԱՄՀ-ի լավատեսական կանխատեսումներով կկազմի շուրջ 9.5 տոկոս: ՀՆԱ-ն կարող է ինչպես ավելանալ, այնպես էլ նվազել, սակայն այն հստակ չի հասնի անկման երկնիշ ցուցանիշի», - ասաց Օմեսը:
Նրա խոսքերով, ԱՄՀ-ի մտահոգությունն է առաջացնում 2009թ.-ի հինգ ամսվա ընթացքում գրանցված ՀՀ ՀՆԱ-ի ցուցանիշի 15,7 տոկոսի անկումը, ինչը պայմանավորված է 2009թ.-ի առաջին հինգ ամսվա ընթացքում 56 տոկոսով շինարարական ոլորտի անկման հետ: Անկման վրա նաև ազդել է Ռուսաստանից ստացվող մասնավոր փոխանցումների կրճատումը:
Որպես դրական կողմեր, որոնք կարող են անդրադառնալ տարվա արդյունքներով ՀՆԱ-ի մակարդակի բարձրացման վրա, նա նշեց վերջին շրջանում գրանցված պղնձի գնի աճը, ինչպես նաև նավթի գնի աճը, ինչը դրականորեն կանդրադառնա Ռուսաստանի վրա և որպես արդյունք՝ Հայաստանի վրա ևս՝ շինարարական ոլորտում արվող մասնավոր փոխանցումների և ներդրումների տեսքով:
«Այս գործոնը հաշվի առնելով՝ ԱՄՀ-ն տարվա արդյունքների կապակցությամբ բավականին լավատես է», - ասաց Օմեսը:
Ինչ վերաբերում է գնաճին, ապա, նրա խոսքերով, Հայաստանում գնաճի միջին ցուցանիշը 2009թ.-ի արդյունքներով, 2008 թ.-ի համեմատ, կկազմի 3 տոկոս: Միաժամանակ ԱՄՀ-ի կանխատեսման համաձայն՝ 2009 թ.-ի դեկտեմբերին, 2008 թ.-ի դեկտեմբերի համաձայն, գնաճը կկազմի 3,5 տոկոսից ոչ ավել:
Նա նշեց, որ այս պահի դրությամբ ԱՄՀ-ի կանխատեսումը շատ մոտ է գնաճի փաստացի ցուցանիշին, որն արդեն կազմում է 3,4 տոկոս, ինչը «բավականին ցածր է կանխատեսված ցուցանիշից»:-0-
