Տեղատարափ անձրևների պատճառով ջրածածկ են եղել ավտոճանապարհի մի հատվածն ու բնակելի տների նկուղները

ԵՐԵՎԱՆ, 24 հունիսի. /Նովոստի-Արմենիա/. Հունիսի 23-ին Վայոց ձորի մարզում  տեղացած անձրևի  հետևանքով առաջացած սելավը վնասել է Մալիշկայի գյուղամիջյան ճանապարհն ու եզրաքարերը՝ մոտ  40 մ երկարությամբ:

Ինչպես «Նովոստի-Արմենիա» գործակալությանը չորեքշաբթի հայտնեցին ՀՀ ԱԻՆ Փրկարար ծառայությունից, նաև ջրալցվել են մի քանի տան նկուղներ:

Դեպքի վայր է մեկնել մարզային փրկարարական վարչության փրկարար ջոկատը:

Ձեռնարկված միջոցառումների արդյունքում ճանապարհը դարձել է երթևեկելի: Կատարվել են նաև ջրահեռացման աշխատանքներ:

Հաղորդագրության համաձայն՝ նույն օրը երեկոյան ահազանգ է ստացվել, որ տեղացած անձրևի հետևանքով ջրալցվել են Երևանի Գաջեգործների փողոցի մի քանի բնակելի տներ:

Դեպքի վայր են մեկնել  քաղաքապետարանի կոմունալ վարչության և Երևանի փրկարարական վարչության Էրեբունի համայնքային բաժնի ներկայացուցիչներ:

Տեղում իրավիճակն ուսումնասիրելուց հետո որոշվել է հունիսի 24-ին իրականացնել դիտահորերի մաքրման աշխատանքներ: -0-