Չորեքշաբթի Երևանում բողոքի ցույց կանցկացվի Սահակաշվիլու այցի կապակցությամբ

Չորեքշաբթի ՀՀ նախագահի նստավայրի մոտ, Վրաստանի նախագահ Միխայիլ Սահակաշվիլու այցի առթիվ, տեղի է ունենալու բողոքի ակցիա, «Նովոստի-Արմենիա» գործակալությանը հայտնեցին «Միտք» վերլուծական կենտրոնից:

«Ակցիայի ընթացքում «Միտք» կենտրոնի ներկայացուցիչների, ինչպես նաև վերջինիս համախոհ-ներկայացուցիչների կողմից բարձրացվելու են Վրաստանի վարած պետական (եկեղեցական, կրթամշակութային, տնտեսական, լեզվական և այլն) խտրական քաղաքականությանն առնչվող հարցեր»,- ասվում է հաղորդագրության մեջ:

Վրաստանի նախագահից պահանջվելու է նաև Ջավախքում հայոց լեզվին տալ միջազգային իրավունքի նորմերին համապատասխան պետական լեզվի կարգավիճակ, տնտեսական ներդրումներն իրականացնել՝ չոտնահարելով Ջավախքի անվտանգությունը, վերջ տալ Ջավախք-ՀՀ սահմանային անցակետերում նման չափերի ստուգումները, որոնք նվաստացնում են ջավախահայերին:

ՀՀ նախագահ Սերժ Սարգսյանի հրավերով չորեքշաբթի երկօրյա պաշտոնական այցով Հայաստան կժամանեն Վրաստանի նախագահ Միխայիլ Սահակաշվիլին և նրա տիկին Սանդրա Ռուլովսը:--0--