Հայ և բոլիվիացի ռեժիսորների ֆիլմերը կցուցադրվեն ՄՄԿՓ-ի «Հեռանակարները» մրցույթում
Հայ ռեժիսոր Հովհաննես Գալստյանի «Խճճված զուգահեռներ» և բոլիվիացի ռեժիսոր, սցենարիստ և պրոդյուսեր Ռոդրիգո Բեյոտտայի «Դավաճանություն» ֆիլմերը հունիսի 23-ին կշարունակեն «Հեռանկար» մոսկովյան միջազգային 31-րդ կինոփառատոնի (ՄՄԿՓ) մրցութային փուլը, հաղորդում է «ՌԻԱ Նովոստին»:
Ինչպես երկուշաբթի մամուլի ասուլիսի ժամանակ պատմել է Հովհաննես Գալստյանը, «Խճճված զուգահեռներ» ֆիլմի ստեղծման համար նրանից վեց տարի է պահանջվել: Հայաստանի և Նովեգիայի համատեղ նախագծում նա և սցենարիստն է, և ռեժիսորը, և պրոդյուսերը:
Ֆիլմում երկու զուգահեռ պատմություն է ներկայացվում, որոնցից մեկի գործողությունները տեղի են ունենում Երկրորդ համաշխարհային պատերազմի վերջում: Ֆիլմի հերոսուհի Հաննան ժամանակավոր ապաստարան է տալիս փախուստի դիմած ռազմագերի Առաքելին, ով ազգությամբ հայ է:
Այն ժամանակ, երբ Հաննայի ամուսինը մասնակցում է դիմադրությանը, Հաննան, փորձելով զսպել անծանոթի նկատմամբ տածած իր հակասական զգացմունքները, սկսում է օրագիր պահել: Այս գործողություններին զուգահեռ հանդիսատեսը հետևում է Հաննայի դստեր՝ Լաուրայի պատմությանը, ով մաթեմատիկայի ուսուցչուհի է: Լաուրան ապրում է Երևանում ինքնամփոփ կյանքով: Պատահաբար նրա ձեռքն է ընկնում մոր օրագիրը, և հենց ծանոթանում է ծնողների պատմությանը, «գաղտնի սերը» նաև նրա կյանք է ներխուժում:
Ռեժիսորի խոսքերով, այս պատմության հիմքում իրական փաստեր են ընկած, որոնք հիմնված են հայ ռազմագերի զինվորի պատմությունների վրա, ով 1945թ.-ին աշխատել է նորվեգական ընկերություններից մեկում:
«Համակենտրոնացման ճամբարի նախկին կալանավորներից մեկը պատմել է ինձ, որ նորվեգացիները ճամբարներից ռուս գերիներ էին գնում աշխատանքների համար: Եվ ինչպես նա էր պատմում, դրանք Նորվեգիայում անցկացրած իր կյանքի ամենաերջանիկ տարիներն էին», - պատմել է Գալստյանը:
Նա ավելացրել է, որ մեկնել է Նորվեգիա երկրի կյանքի մթնոլորտը զգալու համար: Հաննայի դերում առաջին անգամ հանդես է եկել նորվեգացի դերասանուհի Սիրի Հելենե Մյուլլերը: Դերասանուհին իր հերթին իր նորածին դստեր հետ այցելել է հայկական գյուղ պատմության մեջ ընկղմվելու համար: Դերասանուհու դուստրը ևս նկարահանվել է այդ ֆիլմում:-0-
