Ծաղկաձորում անցկացվում է «Հայաստանը հեռահաղորդակցությունների խաչմերուկում» թեմայով միջազգային կոնֆերանսը:
Ինչպես կոնֆերանսի բացման արարողության ժամանակ ասաց «Եվրասիական հետազոտությունների ինստիտուտ» զարգացման հիմնադրամ ոչ առևտրային կազմակերպության նախագահ Վալերի Տուրսունովը, «Հայաստանը հեռահաղորդակցությունների խաչմերուկում» կոնֆերանսի օրակարգում ներառված հարցերի քննարկումը կօգնի միջտարածաշրջանային և տնտեսական փոխգործակցության գործընթացներում Հայաստանի ներգրավմանն ու նրա համապարփակ մասնակցությանը խոշոր հաղորդակցական նախագծերում:
«Մենք ևս հույս ունենք, որ այս նախագծերի իրագործումը կնպաստի ոչ միայն Հայաստանում տնտեսական գործընթացներին, այլև ողջ տարածաշրջանում քաղաքական կայունությանն ու գործընթացի բոլոր մասնակիցների փոխշահավետությանը», - ասաց նա:
Երևանի պետական համալսարանի Մշակույթների և քաղաքակրթությունների խնդիրների ուսումնասիրման հայկական կենտրոնի տնօրեն Դավիթ Հովհաննիսյանն իր հերթին ասաց, որ չափազանց շատ շահեր են բախվում և միմյանց հակազդում Սև և Կասպից ծովերի միջև սեղմված փոքր ենթաշրջանում, որը կարող է ակտիվորեն գործող կամուրջ և խաչմերուկ լինել:
«Այն, որ Հայաստանն այսօր Ռուսաստանի նախաձեռնության և աջակցության շնորհիվ «Հայաստանը հեռահաղորդակցությունների խաչմերուկում» թեմայի պես թեմա է առաջ քաշում, վկայում է այն մասին, թե ինչպիսի կարևորություն ենք մենք հաղորդում Հայաստանի միջով անցնող կամ չանցնող ուղիների որոշ մեկուսացումը հանելուն», - ասաց նա:
Կոնֆերանսն անցկացնում է «Եվրասիական հետազոտությունների ինստիտուտ» զարգացման հիմնադրամ ոչ առևտրային կազմակերպությունը՝ Երևանի պետական համալսարանի Մշակույթների և քաղաքակրթությունների խնդիրների ուսումնասիրման հայկական կենտրոնի հետ համատեղ:
Կոնֆերանսին ծրագրվում է քննարկել հետևյալ թեմաները՝ «Տարածաշրջանը երեք ծովերի (Միջերկրական, Սև և Կասպից) համակարգում: Հայաստանի դերը Կովկասում», «Միջազգային տրանսպորտային-էներգետիկ միջանցքների ռազմավարական դերը Հայաստանի և ողջ կովկասյան տարածաշրջանի համար», «Հայաստանը՝ տեղեկատվական և մշակութային հաղորդակցությունների դիտակետում»:
Միջոցառմանը մասնակցում են պետական իշխանության մարմինների, գործարար հանրության ներկայացուցիչներ, քաղաքագետներ և փորձագետներ Ռուսաստանից, Հայաստանից, Աբխազիայից, Ադրբեջանից, Վրաստանից, Իրանից, Թուրքիայից և Հարավային Օսեթիայից, ԶԼՄ-ների ներկայացուցիչներ:-0-
