ՀՀ վարչապետն ու ՌԴ Կալինինգրադի մարզի նահանգապետը քննարկել են տնտեսական համագործակցության հնարավորությունները

ՀՀ վարչապետ Տիգրան Սարգսյանը և  Ռուսաստանի Դաշնության Կալինինգրադի մարզի նահանգապետ Գեորգի Բոոսն ուրբաթ քննարկել են տնտեսական համագործակցության հնարավորությունները, «Նովոստի-Արմենիա» գործակալությանը հայտնեցին կառավարության մամուլի ծառայությունից։

ՀՀ կառավարության ղեկավարը խոսել է հայ-ռուսական հարաբերությունների զարգացման նոր հնարավորությունների մասին, որոնց շարքում կարեւոր տեղ են գրավում նաեւ տնտեսական կապերը Ռուսաստանի Դաշնության տարածաշրջանների հետ:

Բոոսը ներկայացրել է մարզի տնտեսության զարգացման հիմնական ուղղությունները, բանկային համակարգում ընթացող բարեփոխումները, ներդրումների խթանմանը միտված միջոցառումները։

Նա նշել է, որ Հայաստանի նկատմամբ հետաքրքրությունը պայմանավորված է նաև նրանով, որ Կալինինգրադի մարզը մեծ նշանակություն է տալիս  կապերի զարգացմանը հատկապես այն երկրների հետ, որոնք պատմականորեն և հոգևոր առումով մոտ են Ռուսաստանին:

Զրույցի ընթացքում մտքեր են փոխանակվել գյուղմթերքների, շինարարական և արդյունաբերական ապրանքների, առևտրի, ոսկերչության, նաև զբոսաշրջության ոլորտներում համագործակցության վերաբերյալ: 

Խոսելով տնտեսական կապերի զարգացման և համատեղ ծրագրերի իրականացման հնարավորությունների մասին` զրուցակիցները կարևորել են գործարար կապերի ամրապնդմանն ուղղված ջանքերը, ինչին, անկասկած, նպաստ կբերեն Երևանի «Մոսկվայի տանն» անցկացված բիզնես-համաժողովը և Կալինինգրադի մարզի արդյունաբերական ձեռնարկությունների արտադրանքի ցուցահանդեսը:

Կողմերը ցանկություն են հայտնել, որպեսզի գործարարների միջև նման հանդիպում կազմակերպվի նաև Կալինինգրադի մարզում:

Կալինինգրադի շրջանի Առևտրի նախարարության տվյալներով՝ 2008 թ.-ին դեպի Հայաստան ներկրումը կազմել է  1 550, 5 հազ. ԱՄՆ դոլար, իսկ Հայաստանից իրականացվող արտահանումը՝ 145,5 հազար դոլար: —0—