Վանաձորում բնակարանամուտ է տոնել 1988թ.-ի երկրաշարժից տուժած տասնվեց ընտանիք

Վանաձորում բնակարանամուտ է տոնել 1988 թ.-ի երկրաշարժից հետո ժամանակավոր տնակներում բնակվող 16 ընտանիք, ասվում է «Նովոստի-Արմենիա» գործակալություն ստացված տեղեկատվության մեջ:

Վանաձորի «Տարոն-3» թաղամասի տները կառուցվել են նոր տեխնոլոգիայով:

Ծրագրի նախաձեռնողը «ԱՌԴԱ» բարեգործական հիմնադրամի նախագահ ամերիկահայ բարերար Սթիվ Լազարյանն է:

Նախագիծը կյանքի է կոչվել «ԱՌԴԱ» բարեգործական հիմնադրամի, Վանաձորի քաղաքապետարանի և Հայաստանի «Ֆուլեր Տնաշինական Կենտրոնի» համատեղ ներդրման շնորհիվ:

Տների կառուցման ծախսերի 50 տոկոսը ներդրել է «ԱՌԴԱ» բարեգործական հիմնադրամը, 35 տոկոսը` Վանաձորի քաղաքապետարանը, իսկ մնացած 15-ը` Հայաստանի «Ֆուլեր Տնաշինական Կենտրոնը»:

Վանաձորի քաղաքապետարանն իրականացրել է նաև հողահատկացման, տարածքի հարթեցման, խմելու ջրի և կոյուղու արտաքին կոմունիկացիոն աշխատանքները:

Գազաֆիկացման աշխատանքներն իրականացվել են «ՀայՌուսգազարդի», իսկ էլեկտրիֆիկացման աշխատանքները` «Հայաստանի էլեկտրացանցեր» կազմակերպության միջոցներով:

Յուրաքանչյուր տան շինարարության համար ծախսվել է շուրջ 5,2 միլիոն դրամ (13,6 հազ. դոլար):-0-