Սիրիահայերի նախաձեռնությամբ Երևանում կկառուցվի արաբ ժողովրդին երախտիքի հուշարձան, ասել է ՀՀ ԱԺ խոսնակ Հովիկ Աբրահամյանը Սիրիայի նախագահ Բաշար ալ-Ասադի հետ հանդիպման ժամանակ:
Ինչպես չորեքշաբթի «Նովոստի-Արմենիա» գործակալությանը տեղեկացրեցին ՀՀ ԱԺ հասարակայնության հետ կապերի վարչությունից, Աբրահամյանն ասել է, որ հայ ժողովուրդը երբեք չի մոռանա այն աջակցությունը, որը սիրիացի ժողովուրդը ցուցաբերեց բռնագաղթված հայերին:
ՀՀ ԱԺ խոսնակը բարձր է գնահատել լուսահոգի նախագահ Հաֆեզ ալ-Ասադի դերը մերձավորարևելյան քաղաքականության պատմության մեջ:
Սիրիայի նախագահ ալ-Ասադն իր հերթին բարձր է գնահատել սիրիահայ համայնքի դերակատարումը ինչպես իրենց երկրի կյանքում, այդպես էլ Հայաստանի հետ հարաբերությունները զարգացման գործում:
Կողմերը համաձայնել են, որ հայ-սիրիական հարաբերությունների ներուժն ամբողջությամբ իրացնելու գործում յուրահատուկ ներդրում կարող են կատարել երկու երկրների խորհրդարանականները:
Զրուցակիցները նաև համակարծիք էին, որ Հայաստանի և Սիրիայի ժողովուրդների միջև առկա է փոխադարձ անկեղծ համակրանք, որն ամրապնդում է երկու երկրների բարեկամական հարաբերությունները:
Զրույցի ընթացքում ԱԺ նախագահն ու Սիրիայի նախագահը նաև քննարկել են հայ-թուրքական և սիրիա-թուրքական հարաբերությունները, ինչպես նաև Հարավային Կովկասի և Մերձավոր Արևելքի տարածաշրջանների կայունությանն ու անվտանգությանը վերաբերող մի շարք այլ հարցեր:-0-
