Բելառուսում հայ գործարարների համար կստեղծվեն ամենաբարենպաստ պայմանները. Լուկաշենկո

Բելառուսում հայ գործարարների համար կստեղծվեն ամենաբարենպաստ պայմանները, երեքշաբթի հայտարարել է Բելառուսի Հանրապետության նախագահ Ալեքանդր Լուկաշենկոն Հայաստանի գործարար շրջանակների ներկայացուցիչների հետ հանդիպման ժամանակ:

Ինչպես հաղորդում է Բելառուսի նախագահի պաշտոնական ինտերնետային կայքը, Բելառուսի նախագահը, 2009 թ.-ի մարտին աշխատանքային այցով լինելով Հայաստանում, առաջարկել է հայկական գործարար շրջանակներին ներդրումային և այլ նախագծեր իրականացնել Բելառուսում:

Ներդրումներ կատարելու հնարավորությունների հետ ծանոթանալու նպատակով Մինսկ են մեկնել «Մուլտի Գրուպ» կոնցեռնի նախագահ Գագիկ Ծառուկյանն ու «Արդիմպեքս» ՍՊԸ-ի գլխավոր տնօրեն Ռոբերտ Տոնոյանը:

Հյուրերի հետ զրույցի ընթացքում Ալեքսանդր Լուկաշենկոն նշել է, որ «2-3 տարվա ընթացքում մենք տասն անգամ ավելացրել ենք փոխադարձ առևտրի ծավալը Հայաստանի հետ. մի երկրի հետ, որը գործնականում հայտնվել է «փակված» վիճակում»:

«Մենք ուղիներ գտանք երկու երկրների շուկաներ ապրանքի փոխադարձ մատակարարումների համար՝ ավելացնելով առևտրի ծավալները: Նշանակում է՝ մենք լավ հնարավորություններ ունենք», - ասել է Բելառուսի նախագահը:

«Ես կողջունեմ Հայաստանի գործարարների ակտիվությունը: Հայ և սերբ գործարարները մեզ համար առաջնահերթ կլինեն: Ես նման որոշում եմ ընդունել տարվա սկզբին: Մենք կստեղծենք բոլոր պայմանները Բելառուսում աշխատելու համար, հատկապես նրանց համար, ովքեր միջոցներ կներդնեն», - ընդգծել է Ալեքսանդր Լուկաշենկոն:

Բելառուսի նախագահն ավելացրել է, որ եթե հայկական գործարար շրջանակների ձեռներեցները Բելառուսում արտադրություններ բացեն, որոնք կփոխարինեն ներկրումը, ապա նրանց համար կստեղծվեն լավագույն պայմանները:

Միաժամանակ Բելառուսի նախագահը հավաստիացրել է, որ «հայ գործարարները կարող են չկասկածել, որ հնարավորություն կունենան, անհրաժեշտության դեպքում, երկրից դուրս հանել այն կապիտալը, որն աշխատել են մեր հանրապետությունում»:

«Հայաստանը լավագույն ժամանակները չի ապրում, այն գործնականում չունի ելք ոչ դեպի Արևելք, ոչ դեպի Արևմուտք, այդ պատճառով դեպի Եվրոպա հայ ձեռներեցների ելքը դրական փաստ է», - ասել է Ալեքսանդր Լուկաշենկոն:

Նախագահը գործարարների հետ զրույցի ժամանակ առաջարկել է Գագիկ Ծառուկյանին հնարավորինս աջակցել հայերին, որոնք ցանկանում են բիզնես ծավալել Բելառուսում: «Դուք կարող էիք ինքնատիպ համակարգող դառնալ Բելառուսում հայ ձեռներեցների համար», - կարծում է Բելառուսի նախագահը:

Հայաստանի գործարար շրջանակների ներկայացուցիչները ընդգծել են, որ շահագրգռված են Բելառուսի հետ համագործկացությամբ: Գործարարները ցանկանում են ուսումնասիրել այն հարցը, թե ինչ ուղղություններով Բելառուսն ու Հայաստանը կարող են արդյունավետ համագործակցել համաշխարհային ֆինանսատնտեսական ճգնաժամի պայմաններում:

Բելառուսի և Հայաստանի փոխադարձ ապրանքաշրջանառությունը նախորդ տարի 2007 թ.- համեմատ ավելացել է 18.9 տոկոսով և կազմել 28,2 մլն դոլար:-0-