Համաներում հայտարարելու մասին Հայաստանի նախագահի առաջարկում հիշատակվում են մարտյան իրադարձությունների ժամանակ հանցագործություն կատարած անձինք
ԵՐԵՎԱՆ, 17 հունիսի. /Նովոստի-Արմենիա/. Համաներում հայտարարելու մասին ՀՀ նախագահ Սերժ Սարսգյանի առաջարկի մեջ, որն ուղարկվել է ՀՀ Ազգային ժողով, անդրադարձ կա մարտյան իրադարձությունների առնչությամբ հանցագործություն կատարած անձանց մասին, ասել է ՀՀ նախագահի մամուլի քարտուղար Սամվել Ֆարմանյանը:
Հայկական ընդդիմությունը՝ ՀՀ առաջին նախագահ Լևոն Տեր-Պետրոսյանի գլխավորությամբ, ով իր թեկնածությունն էր առաջադրել փետրվարի 19-ի նախագահական ընտրություններին և պարտություն էր կրել, 2008 թ.-ի փետրվարի 20-ից Երևանի կենտրոնում հանրահավաքներ էր անցկացնում՝ դժգոհություն հայտնելով քվեարկության արդյունքների կապակցությամբ:
2008 թ.-ի մարտի 1-2-ին բողոքի ակցիաները վերածվեցին անկարգությունների և հանրահավաքի մասնակիցների ու իրավապահ մարմինների միջև բախումների, որոնց հետևանքով զոհվեց տասը և վիրավորվեց ավելի քան 200 մարդ:
«Համաներում հայտարարելու նախագահի առաջարկությունը, որն առաջիկայում կքննարկվի խորհրդարանում, մանրամասնորեն սահմանում է համաներման բոլոր պայմանները: Առաջարկության մեջ մարտի 1-2-ին Երևան քաղաքում տեղի ունեցած իրադարձությունների առնչությամբ հանցագործություն կատարած անձանց ևս անդրադարձ կա», - մեջբերեցին Ֆարմանյանի խոսքերը ՀՀ նախագահի մամուլի ծառայությունից:
Ֆարմանյանի խոսքերով՝ նախագահ Սարգսյանը մեկ անգամ չէ, որ հայտարարել է մեր հասարակությանը հուզող և հանրային հնչեղություն ունեցող խնդիրները լուծելիս հասարակության, նրա տարբեր տարբեր շերտերի մոտեցումներն ու կարծիքները այս կամ այն մեխանիզմով պարզելու և այդ տրամադրություններով առաջնորդվելու իր հաստատակամության մասին:
«Հանրապետության նախագահի առաջարկության վերաբերյալ մեր հասարակության մեջ տեղ գտան ակտիվ ու բազմակողմանի քննարկումներ: Տարբեր քաղաքական կուսակցություններ և գործիչներ, Հանրային խորհուրդը, խորհրդարանական ժամանակավոր հանձնաժողովը, Մարդու իրավունքների պաշտպանը, հասարակական և իրավապաշտպան կառույցներ, քաղաքացիական հասարակության ներկայացուցիչներ, լրագրողներ ու մտավորականներ հնարավորություն ունեցան համաներում հայտարարելու անհրաժեշտության ու դրա պայմանների շուրջ արտահայտելու իրենց տեսակետները, նախագահին ներկայացնելու իրենց առաջարկությունները: Հանրային քննարկումների այդ գործընթացն ինքնին ողջունելի», - ասել է Ֆարմանյանը:
Նրա խոսքերով՝ ՀՀ նախագահի աշխատակազմն այս ընթացքում ուշիուշով հետևել է քննարկումների ընթացքին, ամփոփել ներկայացված առաջարկությունները և զեկուցել երկրի ղեկավարին:
«Ամփոփելով համաներում հայտարարելու իր կոչին հաջորդած գործընթացը և առաջնորդվելով Սահմանադրության 70-րդ հոդվածով` նախագահ Սերժ Սարգսյանն այսօր պաշտոնապես դիմել է Ազգային ժողովի նախագահին, հունիսի 19-ին, ժ. 12.00-ին Հայաստանի Հանրապետության Ազգային ժողովի արտահերթ նստաշրջան հրավիրելու առաջարկությամբ: Նախագահ Սերժ Սարգսյանի սահմանմամբ արտահերթ նստաշրջանի օրակարգում ներառված է մեկ հարց` Սահմանադրության 81-րդ հոդվածի առաջին մասի դրույթներին համաձայն, համաներում հայտարարելու վերաբերյալ Նախագահի առաջարկությունը» - նշել է Ֆարմանյանը:-0-
