ՀՀ ԱԺ խոսնակ Հովիկ Աբրահամյանը ստորագրել է որոշում, ըստ որի՝ հունիսի 19-ին կգումարվի ՀՀ ԱԺ արտահերթ նստաշրջան, հաղորդում է ՀՀ ԱԺ հասարակայնության հետ կապերի վարչությունը:
Նստաշրջանի օրակարգում ընդգրկված է ՀՀ նախագահ Սերժ Սարգսյանի առաջարկությունը համաներում հայտարարելու մասին:
ՀՀ նախագահը մայիսի 28-ին հայտարարել է երկրում համաներում հայտարարելու պատրաստակամության մասին: Վերջին համաներումը հայտարարվել է 2006 թ.-ին:
ՀՀ նախագահ Սերժ Սարգսյանը մայիսի 8-ին բոլոր քաղաքական ուժերին և հասարակական գործիչներին, մասնավորապես, Հանրային խորհրդին, առաջարկել է իրենց առաջարկները ներկայացնել համաներման անցկացման անհրաժեշտության և կարգի վերաբերյալ։
Հանրային խորհուրդը հունիսի 10-ին հայտարարել է ՀՀ նախագահ Սերժ Սարգսյանին համաներում հայտարարելու առաջարկ անելու մտադրության մասին:
Ավելի վաղ ՀՀ ԱԺ խոսնակ Հովիկ Աբրահամյանը տեղեկացրել է, որ ՀՀ նախագահը կարող է համաներում հայտարարել 2008 թ.-ի մարտի 1-2-ին Երևանում տեղի ունեցած անկարգությունների փաստով ձերբակալվածների նկատմամբ:
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ին բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։-0-
