ՀՀ ազգային վիճակագրության ծառայության (ԱՎԾ) պաշտոնական տվյալներով՝ 2009 թ.-ի ապրիլի 1-ի դրությամբ Հայաստանի բնակչության թիվը կազմում է 3 միլիոն 238,9 հազ. մարդ:
Համեմատելով ՀՀ ԱՎԾ-ի կողմից տրամադրված տվյալները 2009 թ.-ի հունվարի 1-ի տվյալների հետ, որոնց համաձայն Հայաստանում բնակվում էր 3 մլն 238,4 հազ. մարդ, կարելի է տեսնել, որ երկրի բնակչության թիվն աճել է 0,5 հազարով:
ԱՎԾ-ի տվյալներով, 2009 թ.-ի ապրիլի 1-ի դրությամբ Հայաստանի քաղաքային բնակչության թիվը կազմել է 2 մլն 74,2 հազ. մարդ, իսկ գյուղական բնակչության թիվը՝ 1 մլն 64,7 հազ. մարդ: Հարկ է նշել, որ 2009 թ.-ի հունվարի 1-ի դրությամբ երկրում բնակվում էր 2 միլիոն 75 հազ. քաղաքաբնակ: Նույն ժամանակահատվածում գյուղական բնակիչների թիվը կազմում էր 1 մլն 163,4 հազ. մարդ:
Երևանում 2009 թ.-ի ապրիլի 1-ի դրությամբ բնակվում է 1 մլն 112,1 հազ. բնակիչ (2009 թ.-ի հունվարի 1-ի դրությամբ՝ 1 մլն 111,3 հազ. մարդ): Բնակչության թվով երկրորդ տեղում է Արմավիրի մարզը, որտեղ բնակվում է 282,9 հազ. մարդ: Ամենաքիչ բնակչությունն ունի Վայոց-Ձորի մարզը, որտեղ 2009 թ.-ի ապրիլի 1-ի դրությամբ բնակվում է 55,8 հազ. մարդ:
Երևանը ևս առաջատար դիրք է զբաղեցնում քաղաքային բնակչության թվով: Երկրորդ տեղում է Շիրակի մարզը, որտեղ 2009 թ.-ի ապրիլի 1-ի դրությամբ բնակվում է 169,1 հազ. քաղաքաբնակ: Առաջատարների պայմանական եռյակը եզրափակում է Լոռու մարզը, որտեղ վերջին տվյալների համաձայն՝ քաղաքներում բնակվում է 165,1 հազ. մարդ: Ամենաքիչ քաղաքաբնակների թիվը գրանցվել է Վայոց-Ձորի մարզում՝ 19,3 հազ. մարդ:
Պաշտոնական վիճակագրության տվյալների համաձայն, երկրում գյուղական բնակչության թվով առաջատարն է Արարատի մարզը, որտեղ բնակվում է 196 հազ. գյուղաբնակ, երկրորդ տեղում է Արմավիրի մարզը՝ 181,7 հազ. գյուղաբնակ: Ամենաքիչ գյուղաբնակների թիվը գրանցվել է Վայոց-Ձորի մարզում՝ 36,5 հազ. գյուղաբնակ:-0-
