ԵՐԵՎԱՆ, 15 հունիսի. /Նովոստի-Արմենիա/. Համաներման հարցը Հայաստանում չպետք է դիտարկվի քաղաքական հարթությունում, կարծում է «Նոր ժամանակներ» ընդդիմադիր կուսակցության առաջնորդ Արամ Կարապետյանը։
«Միանշանակ կարող եմ ասել, որ իմ կարծիքը համաներման վերաբերյալ շատ դրական է, բայց այն, որ դա արվում է քաղաքական հարթությունում, բացասական երևույթ է»,- երկուշաբթի լրագրողներին հայտնեց Կարապետյանը։
Նա ասաց, որ համաներումը` որպես իրավական կատեգորիա, ճիշտ է, «բայց քաղաքականացնել այդ հարցն ու ասել, թե մենք չենք կամենում այդ անել, բայց անում ենք հանրության համար, ճիշտ չէ»։
ՀՀ նախագահ Սերժ Սարգսյանը մայիսի 8-ին բոլոր քաղաքական ուժերին և հասարակական գործիչներին, մասնավորապես, Հանրային խորհրդին, առաջարկել է իրենց առաջարկները ներկայացնել համաներման անցկացման անհրաժեշտության և կարգի վերաբերյալ։
Հանրային խորհուրդը հունիսի 10-ին հայտարարել է ՀՀ նախագահ Սերժ Սարգսյանին համաներում հայտարարելու առաջարկ անելու մտադրության մասին:
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ին բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։-0-
