ՀՀ նախագահ Սերժ Սարգսյանը կարծում է, որ ՀԱՊԿ-ում Հայաստանի նախագահության մեկ տարվա ընթացքում օգտակար շատ բան է արվել:
«Համոզված եմ, որ վերջին տարիների ընթացքում մենք կոնկրետ բովանդակություն հաղորդեցինք ընդունված շատ որոշումների: Մեկ տարի առաջ, երբ Հայաստանը ստանձնեց նախագահությունը, ես ասում էի, որ և Հայաստանը և ՀԱՊԿ երկրները կաշխատեն ոչ միայն ընդունված որոշումների, այլև նոր գաղափարների վրա` հարստացնելով մեր պայմանագիրը», - ասել է Սարգսյանը Մոսկվայում ՀԱՊԿ պետությունների նախագահների խորհրդի նիստից հետո` պատասխանելով «Նովոստի-Արմենիա» գործակալության հարցին:
Սարգսյանը նշել է երկու պահ`առաջինը` ԱԱՀՈՒ-ի ստեղծումը, երկրորդը` արտաքին-քաղաքական գործունեության ավելի սերտ կոորդինացիան:
ՀՀ նախագահը պարզաբանել է, որ ՀԱՊԿ երկրներն առաջին անգամ հավաքվեցին ՄԱԿ-ի Գլխավոր ասամբլեայի և ԵԱՀԿ ԱԳ նախարարների խորհրդի նիստից առաջ, և այդ խորհրդակցություններից հետո կոնկրետ հարցերի շուրջ կոնկրետ մոտեցումներ մշակվեցին:
Սարգսյանն ասել է, որ դա վկայում է այն մասին, որ մեկ տարվա ընթացքում զգալի և լուրջ աշխատանք է իրականացվել:
Նրա խոսքերով` արագ արձագանքման հավաքական ուժերն այն գաղափարների նյութականացումն է, որոնք ընկած են ՀԱՊԿ-ի հիմքում:
ՀԱՊԿ-ում նախագահությունը ժամանակավորապես Հայաստանից փոխանցվել է Ռուսաստանին, քանի որ Բելառուսը հրաժարվել է մասնակցել կազմակերպության մոսկովյան գագաթնաժողովին:
Կիրակի բելառուսական պատվիրակությունը չի ներկայացել գագաթնաժողովին` իր քայլը բացատրելով մասնակից-երկրներից մեկի կողմից իրականացվող «տնտեսական խտրականությամբ»:
ՀԱՊԿ-ի կազմում են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանն ու Ուզբեկստանը:-0-
