Վերակառուցման և զարգացման եվրոպական բանկը նախատեսում է 2009 թվականին Հայաստանին 80-90 մլն եվրո տրամադրել ֆինանսատնտեսական ճգնաժամը սահուն հաղթահարելու համար, ուրբաթ հայտարարեց ՎԶԵԲ երևանյան գրասենյակի ղեկավար Վալերի Ռազլոգովը հայկական «Հայէկոնոմբանկի» բաժնետերերի տարեկան ժողովի ընթացքում։
«ՎԶԵԲ-ը փորձում է օգնել մեր երկրներին սահուն և առանց մեծ կորուստների հաղթահարել ճգնաժամը, մենք նախատեսում ենք 7 մլրդ եվրո ներդնել 29 մասնակից-երկրներում։ Հայաստանում մենք նույնպես նախատեսում ենք հատկացումների մեծացում 2009 թվականին մինչև 80-90 մլն եվրո՝ նախորդ տարվա 52 մլն եվրոյի դիմաց»,- ասաց նա։
Ռազլոգովի խոսքերով՝ Հայաստանին հատկացվող գումարի աճը բավականին էական է այն դեքում, որ գումարի այս ծավալը վերջնական չէ, այլ անհրաժեշտության դեպքում կմեծացվի։
ՎԶԵԲ երևանյան գրասենյակի ղեկավարը հայտնեց, որ բանկի կոմիտեն արդեն հավանություն է տվել Հայաստանի գծով նոր ռազմավարությանը, որը շուտով կհրապարակվի։
Այս ռազմավարությունում առանձին տեղ է հատկացվում, ինչպես նա ընդգծեց, երկրի բանկային հատվածին, որը ՎԶԵԲ-ի համար Հայաստանի ընկերություններին, գործարարներին ու բնակչությանը վարկերի տրամադրման ուղի է։
«Մենք հույս ունենք մեծացնել Հայաստանի բանկային հատվածի վարկավորումը և դիտարկում ենք վարկերի տրամադրում դրամով, ինչն ազգային օրենսդրության պահանջներից է»,- ասաց Ռազլոգովը։
Հայաստանը ՎԶԵԲ-ի անդամ դարձավ 1992թ. դեկտեմբերի 7-ին՝ 10 մլն, եվրո մասնաբաժնով։ ՎԶԵԲ-ը Հայաստանի խոշոր ներդրողներից է, որը 52 ծրագրերի իրականացման միջոցով 202 մլն եվրո է ներդրել:-0-
