Մոսկվայի քաղաքապետ Յուրի Լուժկովը շնորհավորել է Գագիկ Բեգլարյանին՝ Երևանի քաղաքապետ ընտրվելու կապակցությամբ, հաղորդում է Հայաստանի հանրային հեռուստատեսությունը։
«Մոսկվայի բնակիչների, Մոսկվայի կառավարության և անձամբ իմ անունից սրտանց շնորհավորում եմ Ձեզ՝ Երևանի քաղաքապետի բարձր և պատասխանատու պաշտոնում ընտրվելու կապակցությամբ», - ասվում է Մոսկվայի քաղաքապետի շնորհավորական ուղերձում։
Լուժկովը նշել է, որ երկու մայրաքաղաքների միջև կապերը հատուկ դեր են խաղում ռուս-հայկական հարաբերությունների զարգացման գործում և կրում են լայնամասշտաբ և դինամիկ բնույթ, հաջող կերպով իրագործվում են խոշոր փոխշահավետ ծրագրեր։
«Համոզված եմ, որ մայրաքաղաքի ղեկավարի բարձր պաշտոնում Ձեր ընտրվելուց հետո Մոսկվայի և Երևանի միջև բարեկաման հարաբերություններն ու փոխշահավետ համագործակցությունը նոր ազդակ և հետագա կառուցողական զարգացում կստանան», - ընդգծվում է ուղերձում։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է 65 անդամից։ Ավագանու անդամների տեղերի 50 տոկոսից ավելին ստացած ՀՀԿ համամասնական ցուցակի առաջին հորիզոնականը զբաղեցնող Գագիկ Բեգլարյանը դարձավ Երևանի առաջին ընտրված քաղաքապետը:
ՀՀԿ-ն խորհրդում ստացավ 35 մանդատ, «Բարգավաճ Հայաստանը»՝ 17, ՀԱԿ-ը՝ 13 մանդատ: Միաժամանակ ՀԱԿ-ը հրաժարվեց իր մանդատներից: -0-
