Որոշ խախտումներ Երևանի Ավագանու խորհրդի ընտրությունների ընթացքում ստվեր են գցել ընտրությունների ընդհանուր ընթացքի վրա, հինգշաբթի մամուլի ասուլիսի ժամանակ հայտարարեց Հայաստանի Հանրապետական կուսակցության խմբակցության պատգամավոր Համլետ Հարությունյանը։
«Որպես Երևանի բնակիչ՝ կարծում եմ, որ դա մեզ չի սազում։ Ամենուրեք քվերակության ընթացքը լավ էր, բացի Մալաթիա-Սեբաստիա համայնքից։ Դա ստվեր է գցել ամբողջ ընտրական ընթացքի վրա, բայց ընդհանուր առմամբ ընտրությունները լավ են անցել»,- աասց նա։
Միաժամանակ Հարությունյանն անընդունելի է համարում ընդդիմադիր ՀԱԿ-ի որոշումը՝ Երևանի Ավագանու խորհրդում իր մանդատներից հրաժարվելու մասին։
«Ափսոսում եմ, որ ընդդիմությունը ներկայացված չէ Խորհրդում։ Ինձ համար նրանց որոշումը ցնցող էր»,- ասաց Հարությունյանը։
Նրա կարծիքով, ընդդիմությունը պետք է ներկայացներ Խորհրդում իր համար քվեարկած մարդկանց կարծիքները, այլ ոչ թե առաջնորդվեր անձնական ամբիցիաներով։
Հայ ազգային կոնգրեսի առաջնորդ Լևոն Տեր-Պետրոսյանը ընտրություններից անմիջապես հետո հայտարարեց, որ ՀԱԿ-ը հրաժարվում է ընտրությունների արդյունքում ստացած բոլոր մանդատներից «բազմաթիվ խախտումների պատճառով»։
Հայաստանի մայրաքաղաքի նորընտիր քաղաքապետ Գագիկ Բեգլարյանի երդմնակալությունը տեղի է ունեցել հինգշաբթի Երևանում ՀՀ նախագահ Սերժ Սարգսյանի, վարչապետ Տիգրան Սարգսյանի, կառավարության անդամների և հասարակայնության ներկայացուցիչների ներկայութայմբ։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է 65 անդամից։ Ավագանու անդամների տեղերի 50 տոկոսից ավելին ստացած ՀՀԿ համամասնական ցուցակի առաջին հորիզոնականը զբաղեցնող Գագիկ Բեգլարյանը դարձավ Երևանի առաջին ընտրված քաղաքապետը:
ՀՀԿ-ն խորհրդում ստացավ 35 մանդատ, «Բարգավաճ Հայաստանը»՝ 17, ՀԱԿ-ը՝ 13 մանդատ: Միաժամանակ ՀԱԿ-ը հրաժարվեց իր մանդատներից: --0—
