ՀՀ Ազգային ժողովի պատգամավորները հինգշաբթի նիստի ժամանակ երկրորդ ընթերցմամբ ընդունեցին ազգային մշակույթի ու ավանդույթների պաշտպանության միջոցների խստացում նախատեսող «Ոչ նյութական մշակութային ժառանգության մասին» օրինագիծը։
Ինչպես հայտարարեց ՀՀ մշակույթի փոխնախարար Գագիկ Գյուրջյանը, մինչև տվյալ օրինագծի մշակումը հայկական օրենսդրությամբ կանոնակարգվում էր միայն հայ ժողովրդի նյութական մշակութային ժառանգության պաշտպանությունը։
«Սա չի նշանակում, որ ոչ նյութական մշակութային ժառանգության պաշտպանությունը լիովին անտեսվում էր։ Ընդհակառակը, 2005 թ.-ին Հայաստանը վավերացրել է ոչ նյութական մշակութային ժառանգության պաշտպանության մասին ՅՈՒՆԵՍԿՕ-ի կոնվենցիան, իսկ 2006 թ.-ին հաստատել համապատասխան հայեցակարգը»,- ասաց նա։
Գյուրջյանի խոսքով, օրինագիծը սահմանում է ոչ նյութական մշակութային ժառանգության հիմնական հասկացությունները, դրա կրողներին, դրա պաշտպանության միջոցները։
Մասնավորապես, ինչպես տեղեկացրեց փոխնախարարը, օրինագիծը որպես ոչ նյութական մշակութային ժառանգության օբյեկտներ սահմանում է ժողովրդական բանահյուսությունը (լեզուն, բարբառները, ժողովրդական բանաստեղծությունները), կատարողական արվեստը (բանաստեղծություններ, էպոսներ), ազգային ժառանգությունը (ժողովրդական տոներ և ծեսեր, երեխաներին դաստիարակելու անադույթներ), ազգային խոհանոցը, ինչպես նաև խաղերը։
Գյուրջյանը հավելեց, որ օրինագիծը սահմանում է ոչ նյութական մշակութային ժառանգության պետական սատարման հիմնական ուղղությունները, ժառանգության պահպանման գործում սահմանափակում է պետական իշխանության, տարածքային ու տեղական ինքնակառավարման մարմինների իրավասությունը, տվյալ գործընթացում ֆիզիկական ու իրավաբանական անձանց, այդ թվում և արտասահմանցիների մասնակցությունը։
«Օրինագիծը հնարավորություն է ստեղծում պաշտպանել արտասահմանում գտնվող հայկական ոչ նյութական մշակութային ժառանգությունը։ Մասնավորապես, Արևմտյան Հայաստանում դեռ կան հայ ժողովրդի մշակույթի ու կենցաղի կրողներ, որոնք մենք պարտավոր ենք պահպանել»,- նշեց Մշակույթի փոխնախարարը։
Նրա խոսքով, հայկական ժառանգության պահպանումը արտասահմանում կիրականացվի երկկողմ պայմանագրերի հիման վրա, մասնավորապես, ներկայում Բուլղարիան նման պայմանագրի հիման վրա արդեն համապատասխան հետազոտություններ է անցկացնում սեփական տարածքում։ -0-
