Հայաստանի ԱԳ նախարարը հերթական անգամ հաստատեց Թուրքիայի հետ առանց նախապայմանների հարաբերություններ հաստատելու հանրապետության պատրաստակամությունը
ՀՀ ԱԳ նախարար Էդվարդ Նալբանդյանը հերթական անգամ հաստատեց հարևան Թուրքիայի հետ առանց նախապայմանների հարաբերություններ հաստատելու հանրապետության պատրաստակամությունը։
«Հայաստանը կարող է բոլորին միայն մեկ բան հայտարարել՝ Հայաստանը պատրաստ է կարգավորել իր հարաբերությունները Թուրքիայի հետ առանց որևէ նախապայմանի, և եթե Թուրքիայի արտգործնախարարի վերջին հայտարարությունն արվել է այդ համատեքստում, և Թուրքիան պատրաստ է շարժվել այդ ուղղությամբ, ապա մենք միայն կարող ենք ողջունել այդ գործընթացը», - հինգշաբթի մամուլի ասուլիսի ժամանակ ասաց Նալբանդյանը։
Միաժամանակ նա հավաստիացրեց, որ Հայաստանը տեղյակ է Հայաստանի հետ շուտափույթ կերպով հարաբերությունները կարգավորելու վերաբերյալ թուրքական կողմի ցանկության մասին Թուրքիայի ԱԳ նախարար Ահմեդ Դավուդօղլուի հայտարարություններին։ Նախարարի խոսքերով՝ Հայաստանը միայն ողջունում է նման հայտարարությունները։
Միաժամանակ ՀՀ ԱԳ նախարարը խորհուրդ տվեց «տարբերել էմոցիոնալը ռացիոնալից» և հասկանալ, թե ում են ուղղված նման հայտարարությունները՝ թուրքական հասարակությա՞նը, Հայաստանի՞ն, Ադրբեջանի՞ն, Վաշինգտոնի՞ն, Մոսկվայի՞ն, թե՞ Բրյուսելին։ Նալբանդյանը հիշեցրեց, որ թուրքական կողմի հայտարարությունները մինչև Դավուդօղլուի վերջին ելույթը միանգամայն այլ բնույթ էին կրում։
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Թուրքիան երկկողմ հարաբերությունների հաստատաման համար առաջ է քաշում մի շարք նախապայմաններ, մասնավորապես, Հայաստանի կողմից Օսմանյան Թուրքիայում 1915թ. իրագործված Եղեռնի ճանաչմանն ուղղված ջանքերից հրաժարվելը և ղարաբաղյան հիմնախնդրի լուծումը` հօգուտ Ադրբեջանի:
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
