Գերմանացի երաժիշտները «Գերմանիայի շաբաթվա» շրջանակներում համերգներով հանդես են գալիս Վայոց Ձորի մարզում

ԵՐԵՎԱՆ, 10 հունիսի. /Նովոստի-Արմենիա/.  Գերմանացի տենոր Քրիստոֆ Շեբենը և դաշնակահար Ստյուարտ Էմերսոնը հունիսի 10-ին և 11-ին համերգներ կունենան Վայոց Ձորի մարզի Ջերմուկ և Եղեգնաձոր քաղաքներում, «Նովոստի-Արմենիա» գործակալությանը հայտնեցին Գերմանիայի դեսպանատան մամուլի ծառայությունից։

«Համերգները կազմակերպված են Գերմանիայի Դաշնային Հանրապետության դեսպանության և Հայաստանի Հանրապետության մշակույթի նախարարության կողմից «Գերմանիայի շաբաթներ 2009» ծրագրի շրջանակում։

«Միջազգային ասպարեզում հաջողություն վայելող և նորարարությամբ աչքի ընկնող  երաժիշտները հանդես կգան Ֆելիքս Մենդելսոն Բարթոլդիի, Յոհաննես Բրամսի, Ֆրանց Շուբերտի և Ռիխարդ Շտրաուսի ստեղծագործություններն ընդգրկող ծրագրով»,- ասվում է մամուլի հաղորդագրության մեջ։
 
Դեսպանությունը կարևոր է համարում Գերմանիայի շաբաթների շրջանակում տեղի ունեցող մշակութային միջոցառումների կազմակերպումը ոչ միայն Երևանում, այլ նաև Հայաստանի մարզերում։ 

«Դեսպանատունը գոհունակություն է հայտնում, որ այդ ձգտմանն աջակցում է նաև մշակույթի նախարարությունը՝ հնարավոր դարձնելով երկու արվեստագետների համերգները մայրաքաղաքից դուրս»,- նշեցին մամուլի ծառայությունից։-0-