Հայաստանի արտգործնախարար Էդվարդ Նալբանդյանը Վրաստան կատարած այցի ընթացքում ջավախահայությանը հուզող հարցեր է քննարկել վրացի գործընկերոջ հետ:
Չորեքշաբթի ՀՀ ԱԺ-ում կառավարության ժամի շրջանակներում նա պատգամավորներին է ներկայացրել հունիսի 7-9-ը Վրաստան կատարած այցի մանրամասները:
«Իհարկե մենք չէինք կարող վրացի գործընկերոջ հետ հանդիպմանը չօգտագործել ընձեռված հնարավորությունը: Հանդիպման ընթացքում մենք քննարկել ենք բազմաթիվ միջազգային, երկկողմ հարցեր, այդ թվում՝ ջավախահայության խնդիրները»,- հայտնեց նա:
Ինչպես ավելացրեց Նալբանդյանը, վրացական կողմը ներկայացրեց ջավախահայության խնդիրների լուծման ուղղությամբ ձեռնարկվող քայլերը, մասնավորապես՝ ճանապարհային շինարարության 102 մլն դոլարի ծրագրի իրականացումը, շրջանի դպրոցական համակարգի զարգացման երկամյա ծրագիրը:
ՀՀ արտգործնախարարը հայտնեց, որ կողմերը բանակցությունների ընթացքում քննարկել են նաև շրջանում նոր տնտեսական ծրագրերի իրագործումը, մասնավորապես նոր ՀԷԿ-ի կառուցումը, որոնք նոր աշխատատեղերի բացում են նախատեսում:
Նալբանդյանն ավելացրեց նաև, որ քննարկվել են հայկական եկեղեցիների կագավիճակին և Վերին Լարսի անցակետի հնարավոր բացմանը վերաբերող հարցեր:
«Վրացական կողմը հսկիչ-անցակետի բացման առնչությամբ Ռուսաստանի հետ բանակցություններ վարելու պատրաստակամություն հայտնեց: Մենք նաև քննարկեցինք հարցեր՝ Վրաստանի նախագահ Միխայիլ Սահակաշվիլու՝ Երևան կատարելիք այցի վերաբերյալ»,- տեղեկացրեց նախարարը:-0-
