ԵՐԵՎԱՆ, 10 հունիսի. /Նովոստի-Արմենիա/. Հայաստանի Հանրապետությունում իր դիվանագիտական առաքելությունն ավարտող ՀՀ-ում Հնդկաստանի արտակարգ և լիազոր դեսպան տիկին Րինա Պանդեյը նշեց երկու երկրների սփյուռքի նախարարությունների միջև հարաբերություններ հաստատելու անհրաժեշտությունը: Այս մասին Պանդեյն ասաց ՀՀ Սփյուռքի նախարար Հրանուշ Հակոբյանի հետ հանդիպման ժամանակ։
«Ընդգծելով աշխարհասփյուռ հայության և նրա Հայրենիքի` Հայաստանի հանրապետության բնականոն հարաբերությունների զարգացման համար Սփյուռքի նախարարության նախաձեռնած ծրագրերի կարևոր նշանակությունը՝ Պանդեյը նշեց, որ նման նախարարություն գործում է նաև Հնդկաստանում և պետք է երկու նախարարությունների միջև համագործակցություն սկսել»,- «Նովոստի-Արմենիա» գործակալությանը հայտնեցին Սփյուռքի նախարարության մամուլի ծառայությունից:
Նախարարը, դեսպանին այցի համար շնորհակալություն հայտնելով, հակիրճ ներկայացրեց Սփյուռքի նախարարության նախաձեռնած և արդեն իրականացված ծրագրերի դրական արդյունքները, մասնավորապես Հայրենիքում համահայկական համաժողովների անցկացման գաղափարի իրագործումը, որն արդեն ստացել է իր պատշաճ գնահատականը` նախևառաջ Հայաստան-Սփյուռք փոխշահավետ գործակցության տեսանկյունից:
Հանդիպման վերջում Հնդկաստանի դեսպանը նշեց, որ Հայաստանում աշխատած տարիների ընթացքում հասցրել է ճանաչել Հայաստանը, մոտիկից ծանոթանալ հայերի գեղեցիկ ավանդույթներին, նրա հերոսական պատմության դրվագներին և, որ աշխարհի այլ երկրներում ևս իր դիվանագիտական առաքելությունն իրականացնելիս, երբեք չի մոռանա Հայաստանն ու հայ ժողովրդին։ -0-
