«Ոսկե ծիրան» փառատոնի ժամանակ կցուցադրվի Փարաջանովի «Նռան գույնը» հայտնի ֆիլմի հայկական տարբերակը

ԵՐԵՎԱՆ, 10 հունիսի. /Նովոստի-Արմենիա/. Հայ մեծ ռեժիսոր Սերգեյ Փարաջանովի 85-ամյակի կապակցությամբ «Ոսկե ծիրան» փառատոնի ժամանակ կցուցադրվի «Նռան գույնը» հայտնի ֆիլմի հայկական տարբերակը, չորեքշաբթի լրագրողներին հայտնեց «Ոսկե ծիրան» փառատոնի ծրագրի տնօրեն Միքայել Ստամբուլցյանը։

«Հաշվի առնելով ժամանակակից հայկական կինոմատոգրաֆի հանդեպ առանձնահատուկ հետաքրքրությունը՝ փառատոնին զուգահեռ Կինոյի տանը կցուցադրվեն հայ ռեժիսորների՝ վերջին երկու տարում նկարահանված ֆիլմերը»,- ասաց Ստամբուլցյանը։

Նա նշեց նաև, որ առաջին անգամ «Արտադրված է Հայաստանում» ծրագրի շրջանակներում կցուցադրվի վերջին տարիներին «Հայք» կինոստուդիայում նկարահանած վավերագրական ֆիլմերի շարքը և հայկական ազգային կինոկենտրոնի ֆիլմերը։  

Ստամբուլցյանը հավելեց, որ փառատոնի նորությունը «Վարպետներ» ծրագիրը կլինի, որի շրջանակներում կներկայացվեն ականավոր դասական ռեժիսորներ Լուիս Բունյուելի, Միքելանջելո Անտոնինիի և Տոնինո Գուերայի մասին երեք ֆիլմերը։  

Վավերագրական ֆիլմերի հատուկ շարքում կցուցադրվեն «Մարգարետ Միդ» նյույորքյան փառատոնի հաղթող ֆիլմերը։

«Ոսկե ծիրան» կինոփառատոնն այս տարի անցկացվում է 6-րդ անգամ` հուլիսի 12-19-ը, ՀՀ մշակույթի նախարարության աջակցությամբ: Կինոփառատոնը, ըստ ավանդույթի, կունենա երեք հիմնական ծրագիր՝ խաղարկային և վավերագրական ֆիլմի միջազգային մրցույթ, ինչպես նաև «Հայկական համայնապատկեր» մրցույթ։

Փառատոնին մասնակցելու է շուրջ 300 ֆիլմ՝ 60 երկրից։ Փառատոնի գլխավոր հովանավորն է ՎիվաՍել-ՄՏՍ ընկերությունը:-0-