ԵՐԵՎԱՆ, 10 հունիսի. /Նովոստի-Արմենիա/. Հավաքական անվտանգության պաշտպանության կազմակերպության արտգործնախարարների խորհրդի՝ հունիսի 14-ին Մոսկվայում անցկացվելիք նիստի օրակարգի նախագծում շուրջ 20 հարց է ընդգրկված, «Նովոստի-Արմենիա» գործակալությանը հայտնեցին Հայաստանում ՀԱՊԿ տեղեկատվական աջակցության միջազգային հասարակական կենտրոնում։
«Արտաքին գերատեսչությունների ղեկավարները կդիտարկեն ՀԱՊԿ փոխգործակցության զարգացման հարցեր այլ միջազգային կառույցների հետ, այդ թվում ՄԱԿ-ի, Աֆղանստանի Իսլամական Հանրապետությունում իրադրության կայունացմանն աջակցելու և Աֆղանստանից բխող սպառնալիքներին ու մարտահրավերներին հակազդելու համատեղ գործողությունների ծրագրի նախագիծը, կլսեն ՀԱՊԿ ԱԳՆԽ նախագահի տեղեկատվությունը, ինչպես նաև ՀՀ արտգործնախարարի ելույթը կազմակերպության անդամ-պետությունների արտաքին քաղաքական գործունեության համակարգման սպառված միջնստաշրջանային ժամանակահատվածում անցկացված միջոցառումների մասին»,- ասվում է հաղորդագրության մեջ։
ԱԳՆ ղեկավարները քննարկեն նաև օպերատիվ արձագանքման հավաքական ուժերի ստեղծման մասին ՀԱՊԿ հավաքական անվտանգության խորհրդի արտահերթ վեհաժողովի որոշման իրականացման ընթացքը, կդիտարկեն դրանց ձևավորման ու կիրառման պատրաստված նորմատիվային իրավական բազան, ինչպես նաև ՀԱՊԿ հավաքական անվտանգության համակարգի միջոցների և ուժերի գաղտնի կառավարման համակարգի ստեղծման հիմնական սկզբունքների մասին համաձայնագրի նախագիծը։
Արտաքին քաղաքական գերատեսչությունների ղեկավարների հավանությանը կներկայացվեն ՀԱՊԿ գործունեության առաջնահերթային ուղղությունները 2009թ.-ի երկրորդ կիսամյակում ու 2010թ.-ի առաջին կիսամյակում և արտաքին քաղաքականության, անվտանգության ու պաշտպանության հարցերով Կազմակերպության անդամ-պետությունների ներկայացուցիչների խորհրդատվության ծրագիրը միևնույն ժամանակահատվածի համար։
ԱԳՆԽ նիստի ընթացքում ծրագրվում է նաև համաձայնեցնել նոր մարտահրավերներին ու սպառնալիքներին հավաքական հակազդման գործուն համակարգի ստեղծմանն ուղղված մի շարք փաստաթղթեր։ Մասնավորապես, արտակարգ իրավիճակներին հավաքական հակազդման համակարգերի ձևավորման ուղղությամբ ՀԱՊԿ անդամ-պետությունների գործողությունների հիմնական ուղղությունների նախագծերը մինչև 2012թ.-ն ընկած ժամանակահատվածը և երրորդ երկրների քաղաքացիների անօրինական միգրացիային հակազդելու հավաքական համակարգի ձևավորման ուղղությամբ Կազմակերպության անդամ-պետությունների գործողությունների ծրագիրը միևնույն ժամանակահատվածի համար։
Կազմակերպության ընթացակարգերի կանոնների համաձայն, ՀԱՊԿ ԱԳՆԽ նախագահի լիազորությունները հերթական միջնստաշրջանային ժամկետում ՀՀ արտգործնախարար Էդվարդ Նալբանդյանից կանցնեն Բելառուսի ԱԳՆ ղեկավար Սերգեյ Մարտինովին։ -0-
