Ռուսական 500 միլիոն դոլարի վարկի միջոցները Հայաստանին կփոխանցվեն մոտ օրերս, ասել է ՀՀ վարչապետ Տիգրան Սարգսյանը։
ՌԴ և ՀՀ ֆինանսների նախարարներ Ալեքսեյ Կուդրինն ու Տիգրան Դավթյանը չորեքշաբթի Երևանին 15 տարի ժամկետով 500 մլն. դոլարի վարկ տրամադրելու մասին համաձայնգիր են ստորագրել LIBOR + 3% տոկոսադրույքով՝ ճգնաժամի պայմաններում երկրի տնտեսությանը սատարելու նպատակով: Դա արտոնյալ տոկոսադրույքով վարկ է, որը ներկայիս պայմաններում տարեկան շուրջ 4 տոկոս է կազմում։
«Ռուսական վարկի ստացման տեսակետից որևէ խնդիր չկա։ Այժմ ընթանում է բանկերի միջև փաստաթղթերի ձևակերպման գործընթացը, թղթակցական հաշիվների փոխանակումն ու փաստաթղթերի պատրաստումը։ Բոլոր որոշումները հաստատվել են, և մոտ օրերս միջոցները կփոխանցվեն մեր հաշվին», - նախօրեին լրագրողներին ասել է Սարգսյանը։
Ռուսական վարկի միջոցների մի մասը կուղղվի ՀՀ կենտրոնական բանկին առընթեր հատուկ ստեղծվող կայունացնող ֆոնդ՝ հակաճգնաժամային միջոցառումների իրականացման համար։ Շուրջ 24 միլիարդ դրամը կուղղվի աղետի գոտու վերականգնողական աշխատանքների իրագործմանը, իսկ 15 միլիարդ դրամը կտրամադրվի Փոքր և միջին բիզնեսի զարգացման ազգային կենտրոնին՝ ՓՄԲ-ի վարկավորման հնարավորություններն ընդլայնելու համար։-0-
