Հայաստանի ընդդիմադիր քաղաքական ուժերը չկարողացան տեր կանգնել իրենց ընտրողներին Երևան Ավագանու խորհրդի ընտրություններում, կարծում է ՀՀ մարդու իրավունքների պաշտպան Արմեն Հարությունյանը։
«Ընտրություններին չներկայացած ընտրազանգվածի մեծ մասը պատկանում էր ընդդիմությանը։ Դա Հայաստանի ընդդիմադիր ուժերի համար պետք է այն բանի ազդանշանը դառնա, որ իրենց ընտրազանգվածը պատշաճ ուժ չտեսավ՝ ի դեմս իրենց թեկնածուների», - ասել է Օմբուդսմենը երեքշաբթի Հայաստանում ընտրական իրավունքների խնդրին նվիրված սեմինարի ընթացքում։
Նրա խոսքերով՝ ընտրություններից հետո Հայաստանի հանրապետական կուսակցությունը՝ որպես հաղթած ուժ, պետք է ունենա նաև մեծ պատասխանատվություն, իսկ ընդդիմությունը պետք է կատարելագործվի և գիտակցի իր ունեցած սխալները։
Օմբուդսմենը նաև նշել է, որ Հայաստանի քաղաքական համակարգում իշխանության և ընդդիմության միջև երկխոսություն չկա։
«Երկխոսության բացակայությունը ժողովրդավարական հասարակությունում շատ վտանգավոր է, քանի որ այդ դեպքում հասարակությունը կորցնում է իր պետության նկատմամբ հետաքրքրությունը», - ասել է Հարությունյանը։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։
Հայկական ընդդիմությունը պնդում է, որ ընտրությունների ընթացքում բազմաթիվ խախտումներ են տեղի ունեցել։
ԿԸՀ վերջնական տվյալների համաձայն՝ Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 186 630 ձայն (46,1 տոկոս)։ 89 131 ձայնով երկրորդ տեղում է «Բարգավաճ Հայաստան» կոալիցիոն կուսակցությունը, 69 140 ձայնով երրորդ տեղում է ընդդիմադիր Հայ ազգային կոնգրեսը։
Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։
Միաժամանակ ընդդիմության ներկայացուցիչները հրաժարվեցին իրենց մանդատներից։
Եվրոպացի դիտորդները հայտարարել են, որ Երևանի ավագանու խորհրդի ընտրությունները կազմակերպվել են եվրոպական չափանիշներին համապատասխան։ Դիտորդների առաքելությունը զգալի առաջընթաց է արձանագրել 2008թ.-ի սեպտեմբերին Հայաստանում անցկացված տեղական ինքնակառավարման մարմինների ընտրությունների համեմատ։-0-
