ԵՐԵՎԱՆ, 9 հունիսի. /Նովոստի-Արմենիա/. ՀՀ բարձրագույն ղեկավարության՝ նախագահ Սերժ Սարգսյանի և արտգործնախարար Էդվարդ Նալբանդյանի հետ հանդիպումները չափազանց արդյունավետ են անցել, երեքշաբթի Երևանում լրագրողներին ասաց ԱՄՆ պետքարտուղարի՝ Եվրոպայի և Եվրասիայի հարցերով տեղակալ Ֆիլիպ Գորդոնը (Philip Gordon)։
«Ես ընդամենը երկու շաբաթ է, ինչ ստանձնել եմ նոր պաշտոնը, սակայն հաշվի առնելով այն, որ տարածաշրջանում տեղի են ունենում բավականին կարևոր և պատմական իրադարձություններ, անհրաժեշտ համարեցի այցելել Հայաստան»,- ասաց Գորդոնը։
Նա նշեց, որ այցի շրջանակներում մտադիր է այցելել նաև տարածաշրջանի այլ երկրներ՝ Վրաստան և Ադրբեջան, սակայն որոշել է իր այցն սկսել հենց Հայաստանից։
Այցի ընթացքում Գորդոնը մի շարք հանդիպումներ է ունեցել ՀՀ քաղաքական գործիչների և քաղաքացիական հասարակության ներկայացուցիչների հետ, ինչպես նաև այցելել է Ցեղասպանության թանգարան-ինստիտուտ ու Ցեղասպանության զոհերի հուշահամալիր։
ԱՄՆ պետքարտուղարի՝ Եվրոպայի և Եվրասիայի հարցերով տեղակալ Ֆիլիպ Գորդոնը (Philip Gordon) տարածաշրջանային այցի շրջանակներում հունիսի 9-ին այցելել է Հայաստան։ Այցի հիմնական նպատակը տարածաշրջանային ու երկկողմ հետաքրքրքություն ներկայացնող հարցերի քննարկումն է։
Մայիսի 15-ին ԱՄՆ պետքարտուղարի՝ Եվրոպայի և Եվրասիայի հարցերով տեղակալի պաշտոնը ստանձնելուց հետո սա Գորդոնի առաջին այցն է Հայաստան։
Մինչ այս պաշտոնը ստանձնելը Գորդոնը զբաղեցնում էր ԱՄՆ և Եվրոպայի արտաքին քաղաքականության գծով ավագ գիտաշխատողի պաշտոնը Վաշինգտոնի Բրուքինգսի ինստիտուտում, իսկ ավելի վաղ Եվրոպայի հարցերով պատասխանատուն էր ԱՄՆ ազգային անվտանգության խորհրդում։ -0-
