ԵՐԵՎԱՆ, 9 հունիսի. /Նովոստի-Արմենիա/. Հունիսի 20-ին Հայաստանում կնշվի Փախստականի համաշխարհային օրը, երեքշաբթի լրագրողներին ասաց ՀՀ տարածքային կառավարման նախարարությանը կից Միգրացիոն գործակալության պետ Գագիկ Եգանյանը:
Նրա խոսքերով՝ Փախստականի համաշխարհային օրը կոչված է, առաջին հերթին, հասարակությանը հիշեցնելու այն մասին, որ իրենց մեջ կան սեփական տնից զրկված ու ծանր սոցիալական պայմաններում ապրող մարդիկ: «Հասարակության վերաբերմունքը նման մարդկանց հանդեպ չափազանց կարևոր է փախստականների՝ հասարակության լիարժեք անդամ դառնալու գործում»,- նշեց Եգանյանը:
Փախստականի համաշխարհային օրը նշվում է 2001 թ.-ից՝ ՄԱԿ-ի Գլխավոր ասամբլեայի բանաձևի համաձայն:
Խոսելով Հայաստանում այդ ոլորտի խնդիրների մասին՝ Եգանյանն ասաց, որ Հայաստանում փախստականների ստույգ թիվը ներկայումս անհայտ է:
«Մենք հենվում ենք Հայաստանում նրանց վերաբնակեցման ժամանակ արված հետազոտությունների տվյալների վրա: Այդ տվյալներով՝ փախստականների թիվը 311 հազար է: Նրանց թիվը ներկայումս, բնականաբար, կրճատվել է»,- ասաց Եգանյանը:
Նրա խոսքով՝ փախստականների ամենասուր խնդիրը բնակարանային հարցն է: «Երբ մարդը ավելի քան 20 տարի ապրում է հանրակացարանում, առանց տարրական սոցիալական պայմանների, նրա մոտ հայրենիքում ապրելու շատ թույլ զգացողություն է մնում»,- ասաց Եգանյանը:
Նա նշեց, որ ներկայումս բնակարանային խնդիրը լուծվում է կառավարության ջանքերով:
«Առաջնահերթային կարգով բնակարանի կարիք ունեցող փախստականների, այսինքն հանրակացարաններում ապրող մարդկանց թիվը այսօր 1100 է: Այդ մարդկանց բնակարանով ապահովելու համար անհրաժեշտ է շուրջ 45 մլն դոլար»,- ասաց Միգրացիոն գործակալության պետը:
Եգանյանը վստահություն հայտնեց, որ խնդիրն առաջիկա տարիներին կլուծվի, քանի որ կառավարությունն այս հարցում կամք և հետևողականություն է դրսևորում: -0-
