ՀՀ Սահմանադրական դատարանը երեքշաբթի նիստի ժամանակ երկրի Մայր Օրենքին համապատասխան է համարել այսպես կոչված Ֆլորենցիայի համաձայնագրի՝ «Կրթական, գիտական և մշակութային բնույթի նյութերի ներմուծման մասին համաձայնագիր» ՅՈՒՆԵՍԿՕ-ի միջազգային կոնվենցիայի նորմերը։
Ինչպես նշվում է ՀՀ Սահմանադրական դատարան ներկայացված ՀՀ ԱԳՆ-ի տեղեկանքում, համաձայնագիրը հաստատվել է ՅՈՒՆԵՍԿՕ-ի Գլխավոր կոնֆերանսի կողմից 1950թ.-ի հունիսի 17-ին Ֆլորենցիա քաղաքում։
Համաձայնագիրը բաց էր ստորագրման համար 1950 թ.-ի նոյեմբերի 22-ին Նյու Յորքում և ուժի մեջ է մտել 1952թ.-ի մայիսի 21-ին։ Այժմ փաստաթուղթը վավերացրել է 103 երկիր, մասնավորապես՝ Ավստրալիան, Ավստրիան, Բելգիան, Հունգարիան, Գերմանիան, Իրանը, Իրաքը, Իռլանդիան, Իսպանիան, Իտալիան, Նոր Զելանդիան, Պորտուգալիան, Ռուսաստանը, Ֆինլանդիան, Ֆրանսիան, Շվեդիան, Շվեյցարիան, Ճապոնիան։
ՀՀ մշակույթի նախարարությունը նպատակահարմար է համարում այս Համաձայնագրի վավերացումը։
ՅՈՒՆԵՍԿՕ-ի կոնվենցիայի համաձայն՝ փաստաթղթի վավերացմամբ պետությունը պարտավորվում է չգանձել մաքսային տուրք կամ այլ գումար լուսավորչական, գիտական և մշակութային բնույթի գրքերի, հրապարակումների, փաստաթղթերի, Համաձայնագրի Հավելվածներում նշված, Կոնվենցիայի այլ մասնակից-պետություններում լույս տեսած նյութերի ներմուծման կամ դուրսբերման համար։
Միաժամանակ, Համաձայնագրի կողմերը պարտավորվում են տրամադրել անհրաժեշտ արտոնագրեր և/կամ արտարժույթ գրադարանների համար նախատեսված գրքերի և հրապարակումների, պաշտոնական խորհրդարանական և վարչական փաստաթղթերի, Միացյալ Ազգերի Կազմակերպության և նրա մասնագիտացված հաստատությունների գրքերի և հրապատարակումների, զբողաշրջության զարգացման համար նախատեսված հրապարակումների, անվճար ուղղարկվող և տարածվող, ինչպես նաև կույրերի համար նախատեսված նյութերի ներմուծման համար։
Համաձայնագրի կողմերը նաև պարտավորվում են տրամադրել հնարավոր բոլոր արտոնությունները լուսավորչական, գիտական և մշակութային բնույթի նյութերի ներմուծման համար, որոնք ներմուծվում են բացառապես երկրի լիազոր մարմինների կողմից ներմուծման թույլտվություն ստացած հրապարակային ցուցահանդեսներում ցուցադրվելու համար, դրանց հետագա դուրսբերման պայմանով։-0-
