«Հայկական հաբիթաթը» վերանվանվել է «Կացարան» բարեգործական կազմակերպության, որն իր նոր ծրագրերը կիրականացնի «Ֆուլեր տնաշինական կենտրոն» բարեգործական կազմակերպության համագործակցությամբ, «Նովոստի-Արմենիա» գործակալությանը հայտնեցին «Ֆուլեր տնաշինական կենտրոնի» մամուլի ծառայությունից։
Հաղորդագրության մեջ ասվում է, որ հունիսի 2-ին «Հայկական Հաբիթաթի» և Միջազգային Հաբիթաթի միջև ստորագրվեց համաձայնագիր, որը արդյունք էր նշված կազմակերպությունների միջև համագործակցության դադարեցման:
Դադարեցնելով համագործակցությունը` «Հայկական Հաբիթաթը» իննամյա գործունեությունից հետո կատարում է անվանափոխություն՝ վերանվանվելով «Կացարան» ԲՀԿ-ի: Այն, հավատարիմ մնալով «Հայկական Հաբիթաթի» որդեգրած առաքելությանը, շարունակելու է աշխատել իր 408 շահառու ընտանիքների հետ, ինչպես նաև հանդես գալ նոր ծրագրերով:
Հաղորդագրության մեջ նշվում է, որ սկսած 2008թ-ից` «Կացարան» ԲՀԿ-ն իր նոր ծրագրերն իրականացնում է` համագործակցելով «Ֆուլեր Տնաշինական Կենտրոն» Հայաստան ԲՀԿ-ի հետ, որը նույնպես նպատակ ունի Հայաստանում նպաստել տնազրկության վերացմանը՝ ցածր եկամուտ ունեցող ընտանիքներին տրամադրելով անտոկոս, երկարաժամկետ (մինչև 20 ժամկետով ) փոխառություն` բարելավելով նրանց բնակարանային պայմանները:
Հաղորդագրության մեջ նշվում է նաև, որ «Ֆուլեր Տնաշինական Կենտրոնը» աջակցում է ցածր եկամուտ ունեցող ընտանիքներին կառուցելու և վերանորոգելու ապահով, պարզ և մատչելի տներ` նրանց տրամադրելով երկարաժամկետ անտոկոս փոխառություն: Ամենամսյա ետվճարները կազմում են շրջանառու ֆոնդ և օգտագործվում այլ ընտանիքներին աջակցելու նպատակով` այսպիսով դառնալով համայնքային զարգացման կայուն ֆինանսական հիմք:-0-
