«Հայ ազգային կոնգրես» նախընտրական դաշինքը Կենտրոնական ընտրական հանձնաժողով է ներկայացրել դիմում-բողոք` Երևանի ավագանու 2009թ. մայիսի 31-ի ընտրությունները անվավեր ճանաչելու պահանջով:
«Դիմում-բողոքն իր մեջ ներառում է ինչպես ընտրությունների նախապատրաստական փուլում, այնպես էլ քվեարկության օրը և արդյունքների բողոքարկման ընթացքում տեղ գտած օրինախախտումները հաստատող փաստաթղթերի փաթեթը»,- ուրբաթ «Նովոստի-Արմենիա» գործակալությանը հայտնեցին ՀԱԿ մամուլի ծառայությունից:
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։
Կենտրոնական ընտրական հանձնաժողովի տվյալներով՝ Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը։
Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։
Հայկական ընդդիմությունը պնդում է, որ ընտրությունների ընթացքում բազմաթիվ խախտումներ են տեղի ունեցել։
Եվրոպացի դիտորդները հայտարարել են, որ Երևանի ավագանու խորհրդի ընտրությունները կազմակերպվել են եվրոպական չափանիշներին համապատասխան։ Դիտորդների առաքելությունը զգալի առաջընթաց է արձանագրել 2008թ.-ի սեպտեմբերին Հայաստանում անցկացված տեղական ինքնակառավարման մարմինների ընտրությունների համեմատ։-0-
