Հայ-թուրքական սահմանի բացումը դրական ազդեցություն կունենա Հայաստանի տնտեսության վրա, հայտարարեց ՀՀ վարչապետ Տիգրան Սարգսյանը։
«Եթե մենք ունենանք այլընտրանքային ուղի, որը թույլ կտա մեզ երկաթուղային ճանապարհով կապվել Եվրոպայի և տարածաշրջանի այլ երկրների հետ, ապա դա էականորեն կբարձրացնի մեր տնտեսական համակարգի անկախությունը»,- ասաց նա ուրբաթ «Ֆինանսաբանկային քոլեջ» հիմնադրամի կազմակերպած «Ճգնաժամը որպես հնարավորություն» երիտասարդ մասնագետների համար նախատեսված սեմինարի ընթացքում։
Սարգսյանի խոսքերով, այսօր Հայաստանը կախված է վրացական ենթակառուցվածքներից, քանի որ հանրապետության արտաքին ապրանքաշրջանառության երկու երրորդն իրականացվում է Վրաստանի տարածքում։ «Կախվածությունն այդ ասպեկտում շատ բացասական է, և մեր հարևանն օգտվում է դրանից, քանի որ կանխիկացման ծախսերը շատ բարձր են, և մեզ չի հաջողվում դրանք նվազեցնել»,- ընդգծեց նա՝ հավելելով, որ ապրանքների փոխադրումը աշխարհի ցանկացած կետից Փոթի կամ Բաթումի փաստացի կրկնակի էժան է, քան Փոթիից և Բաթումիից դեպի Հայաստան։
Այս կապակցությամբ ՀՀ կառավարության ղեկավարը նշեց, որ Վրաստանում մենաշնորհային իրավիճակ է տիրում, ինչն էլ չարաշահում են այդ երկրում։
«Բնականաբար, եթե մենք այլընտրանքային ուղիներ ունենանք, մեր անկախությունն էականորեն կմեծանա, կանխիկացման ծախսերը կտրուկ կկրճատվեն, մենք ավելի էժան ուղիներ կունենանք և, ընդհանուր առմամբ, բիզնեսի մակրոմիջավայրը կփոխվի։ Հայաստանի տնտեսության բազմաթիվ ոլորտներ մրցունակ կդառնան, ինչը տեղի չի ունենում փոխադրման մեծ ծախսերի պատճառով, ինչի կապակցությամբ ապրանքի շատ տեսակներ անհնար է փոխադրել»,- պարզաբանեց նա։
Միաժամանակ Սարգսյանը համոզված է, որ հայ-թուրքական սահմանի բացումից անմիջապես հետո «որևէ հրաշք տեղի չի ունենա, որոշ ժամանակ կպահանջվի համապատասխան ձեռնարկությունների և ներդրումների իրականացման ստեղծման համար»։
Հայաստանի և Թուրքիայի միջև բացակայում են դիվանագիտական հարաբերությունները՝ Թուրքիայի առաջ քաշած նախապայմանների պատճառով։ Մասնավորապես, Թուրքիան Հայաստանից պահանջում է հրաժարվել հայոց Մեծ Եղեռնի միջազգային ճանաչման գործընթացից։
Թուրքիան նաև ադրբեջանամետ քաղաքականություն է վարում ղարաբաղյան հիմնահարցի կարգավորման գործում։
Հայ-թուրքական սահմանը փակ է 1993թ.-ից՝ պաշտոնական Անկարայի նախաձեռնությամբ։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
