Երևանի ավագանու խորհրդի ընտրություններից հետո պահպանվել է իշխանությունների և ընդդիմության քաղաքական հակամարտությունը. ընդդիմադիր գործիչ

Երևանի ավագանու խորհրդի ընտրություններից հետո պահպանվել է իշխանությունների և ընդդիմության քաղաքական հակամարտությունը, կարծում է «Հանրապետություն» հայկական ընդդիմադիր կուսակցության քաղխորհրդի անդամ, Հայ ազգային կոնգրեսի (ՀԱԿ) անդամ Սուրեն Սուրենյանցը։

«Այս ընտրություններն իրենց հետևից մի քանի հետևանք թողեցին։ Առաջին հերթին, ընդդիմությանը չհաջողվեց փոխել երկրի իրավիճակը, իսկ իշխանություններին հաջողվեց անցկացնել ընտրությունները բոլորին հայտնի սցենարով»,- ուրբաթ լրագրողներին ասաց նա։

Ըստ նրա, ընտրությունների արդյունքում ձևավորված քաղաքական հակամարտությունը չի հաղթահարվել։

«Իմ կարծիքով, քաղաքական հակամարտությունն իշխանություն-հասարակություն դաշտից տեղափոխվել է իշխանություն-ընդդիմություն դաշտ»,- հայտարարեց Սուրենյանցը՝ հավելելով, որ ստեղծված իրավիճակում հասարակությունը մնաց խաղից դուրս։

Սուրենյանցը նշեց նաև, որ ընտրությունների արդյունքում քաղաքական դաշտն ավելի հստակ է դարձել։

Նրա կարծիքով, ընտրությունների արդյունքները ցույց են տվել, որ ներկայում Հայաստանում մնացել է իրական ներուժ ունեցող ընդամենը երեք քաղաքական ուժ։

Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։

Կենտրոնական ընտրական հանձնաժողովի տվյալներով՝ Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը։

Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։

Հայկական ընդդիմությունը պնդում է, որ ընտրությունների ընթացքում բազմաթիվ խախտումներ են տեղի ունեցել։

Եվրոպացի դիտորդները հայտարարել են, որ Երևանի ավագանու խորհրդի ընտրությունները կազմակերպվել են եվրոպական չափանիշներին համապատասխան։ Դիտորդների առաքելությունը զգալի առաջընթաց է արձանագրել 2008թ.-ի սեպտեմբերին Հայաստանում անցկացված տեղական ինքնակառավարման մարմինների ընտրությունների համեմատ։-0-