ԱՄՆ պետքարտուղարի տեղակալը հունիսի 9-ին կայցելի Հայաստան

ԵՐԵՎԱՆ, 5 հունիսի. /Նովոստի-Արմենիա/. ԱՄՆ պետքարտուղարի Եվրոպայի և Եվրասիայի  հարցերով տեղակալ Ֆիլիպ Գորդոնը (Philip Gordon) հունիսի 9-ին տարածաշրջանային այցով կլինի Հայաստանում, հաղորդում է Հայաստանում ԱՄՆ դեսպանատան մամուլի ծառայությունը։

«Այցելության նպատակն է քննարկել տարածաշրջանային և երկկողմ հետաքրքրություն ներկայացնող հարցեր: Այցի ընթացքում դոկտոր Գորդոնը հանդիպումներ կունենա իշխանության, քաղաքացիական հասարակության ներկայացուցիչների և այլոց հետ», - ասվում է տեղեկատվության մեջ։

Հայաստանյան այցելությունից հետո դոկտոր Գորդոնը կլինի Վրաստանում և Ադրբեջանում:

2009թ. մայիսի 15-ին Եվրոպայի ու Եվրասիայի գործերով պետքարտուղարի տեղակալի պաշտոնը ստանձնելուց հետո սա դոկտոր Գորդոնի առաջին այցն է Հայաստան։

Նախքան այս պաշտոնին անցնելը Ֆիլիպ Գորդոնը Վաշինգտոնի Բրուքինգսի հաստատությունում եղել է Միացյալ Նահանգների և Եվրոպայի արտաքին քաղաքականության գծով ավագ գիտաշխատող, իսկ դրանից առաջ` Ազգային անվտանգության խորհրդի Եվրոպայի հարցերով պատասխանատու։-0-