2008 թ.-ի մարտի 1-ի անկարգությունների ուսումնասիրման խորհրդարանական ժամանակավոր հանձնաժողովը Երևանում քննարկել է համաներում կիրառելու մասին որոշման նախագիծը, «Նովոստի-Արմենիա» գործակալությանը տեղեկացրեցին ՀՀ ԱԺ հասարակայնության հետ կապերի վարչությունից։
Հանձնաժողովը քննարկել է որոշման նախագիծը՝ նկատի ունենալով ՀՀ նախագահի 2009 թվականի մայիսի 28-ին համաներում կիրառելու անհրաժեշտության մասին քաղաքական ուժերից և հանրային այլ կառույցներից առաջարկություններ ստանալու պատրաստակամությունը։
Նախագիծը ներկայացրել են հանձնաժողովի անդամներ Արծվիկ Մինասյանն ու Նաիրա Զոհրաբյանը։
Մինասյանի կարծիքով՝ համաներում հայտարարելու դեպքում հասարակության մեջ էականորեն կթուլանա ձևավորված լարվածությունը, կնպաստի քաղաքական ուժերի միջև առողջ երկխոսություն ծավալելուն:
Որոշման նախագծով, որը բաղկացած է երկու կետից, առաջարկվում է դիմել ՀՀ նախագահին համաներում (ընդհանուր համաներում) հայտարարելու միջնորդությամբ և երկրորդ` համաներումը չտարածել 2008 թվականի մարտի 1-2-ին տեղի ունեցած դեպքերի ժամանակ մահացած անձանց մահվան հանգամանքներում, ՀՀ քրեական օրենսգրքի հոդվածներով մեղադրվող անձանց նկատմամբ։
Նիստի ընթացքում առաջադրվել են որոշակի առաջարկներ, որոնք, ինչպես հավաստիացրել է Մինասյանը, մանրամասն կքննարկվեն, և անհրաժեշտության դեպքում նախագիծը կվերախմբագրվի:
Նոր խմբագրությամբ որոշման նախագծին դեմ է արտահայտվել ժամանակավոր հանձնաժողովի անդամ, «Նոր ժամանակներ» կուսակցության ներկայացուցիչ Արամ Կարապետյանը։ Նրա կարծիքով` նախագծում պետք է հստակ ամրագրել, որ համաներումը չպետք է տարածվի սպանության մեղադրանքով դատապարտված անձանց վրա:
Արծվիկ Մինասյանն իր հերթին համագործակցության և առավել ընդունելի ձևակերպում փնտրելու պատրաստակամություն է հայտնել։
Մայիսի 28-ին նախագահը պատրաստակամություն հայտնեց օգտվել համաներում շնորհելու իր սահմանադրական իրավունքից։Նախագահի խոսքերով՝ վերջին համաներումը հայտարարվել է 2006 թվականին, և եթե երեք տարվա ընթացքում երկրում հասունացել է նոր համաներում կրրառելու գաղափարն, ապա ինքը պատրաստ է օգտվել իր սահմանադրական իրավունքից։
Նախագահն առաջարկել է բոլոր քաղաքական ուժերին և հասարակական գործիչներին, մասնավորապես, Հանրային խորհրդին, նախագահի նստավայր ներկայացնել իրենց առաջարկությունները համաներման անցկացման անհրաժեշտության և կարգի վերաբերյալ։ Նախագահը նշել է, որ եթե պարզվի, որ իսկապես համաներում հայտարարելու անհրաժեշտություն կա, ապա ինքն անմիջականորեն այդ հարցով կդիմի խորհրդարան։
Ավելի վաղ ՀՀ խորհրդարանի խոսնակ Հովիկ Աբրահամյանը չէր բացառել նախագահի կողմից մարտի 1-ի զանգվածային անկարգությունների գործով ձերբակալվածների նկատմամբ համաներում հայտարարելու հնարավորությունը։--0—
