ԵՐԵՎԱՆ, 4 հունիսի. /Նովոստի-Արմենիա/. ՀՀ ոստիկանության պետ, ոստիկանության գեներալ-մայոր Ալիկ Սարգսյանի գլխավորած պատվիրակությունը մասնակցում է ԱՊՀ պետությունների ներքին գործերի նախարարների խորհրդի հերթական նիստին, հայտնվում է ՀՀ Ոստիկանության պաշտոնական կայքում:
Ուկրաինայի Յալթա քաղաքում հունիսի 4-5-ը տեղի է ունենում ԱՊՀ մասնակից պետությունների ներքին գործերի նախարարների խորհրդի հերթական նիստը:
Հաղորդագրության համաձայն՝ նիստի օրակարգում ԱՊՀ մասնակից պետությունների ներքին գործերի նախարարների (ոստիկանության) համագործակցության վիճակի և հեռանկարների ու հանցավորության դեմ պայքարի միջպետական ծրագրերի իրականացման ընթացքի, տեղեկատվական տեխնոլոգիաների կիրառման հետ կապված՝ հանցագործությունների նոր ձևերի հակազդման համատեղ կանխարգելիչ միջոցների կիրառման, թմրամիջոցների ապօրինի շրջանառության դեմ պայքարում համագործակցության զարգացման, մարդկանց առևտրի դեմ պայքարում ԱՊՀ մասնակից պետությունների ՆԳ նախարարությունների (ոստիկանության) համաձայնագրի, իրավական ապահովման ոլորտում համագործակցության համաձայնագրի հարցերն են։
Հանդիպմանը կքննարկվեն նաև համակարգման բյուրոյի մասնագիտացված տվյալների բանկի գործունեության արդյունավետության բարձրացման վերաբերյալ և ԱՊՀ մասնակից պետությունների տարածքում կազմակերպված հանցավորության և հանցագործությունների այլ վտանգավոր տեսակների դեմ պայքարի հարցեր։
Նիստում կլսվի նաև ԱՊՀ մասնակից պետությունների տարածքում կազմակերպված հանցավորության և հանցագործությունների այլ վտանգավոր տեսակների դեմ պայքարի համակարգման բյուրոյի տնօրենի հաշվետվությունը, քննության կառնվեն ԱՊՀ հակաահաբեկչական կենտրոնի ղեկավարի տեղակալի և ՆԳ նախարարների խորհրդի հերթական նիստի անցկացման վայրի և ժամանակի հարցերը:-0-
